Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 131 Hüküm no: 91 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin Tebriz muharebesinde vefat eden Molla İbrahim’e borcu olduğu Mahmiye-i İstanbul’da Derviş Ali mahâllesinde sâkine olup zâtı ta‘rîf-i şer‘î ile mu‘arrefe olan bâ‘isetü’l-kitâb Ümmü Gülsüm Hatun bt. Abdullah meclis-i şer‘-i şerîf-i enverde mahâlle-i mezbûrede sâkin Mustafa Çelebi b. Hasan mahzarında işbu yedimde olan verâset hücceti mûcebince mûrisim olup diyâr-ı Acem’de medîne-i Tebriz muhârebesinde Acıköprü nâm mahâlde târîh-i kitâbdan sekiz ay mukaddem huzûr-ı Müslimînde bundan akdem şehîden vefât eden Molla İbrahim b. Halil’in mezbûr Mustafa Çelebi zimmetinde cihet-i karz-ı şer‘îden hakkı olan yirmi beş guruşu mezbûr Mustafa Çelebi’den bi’l-verâse taleb ederim suâl olunup alıverilmesi matlûbumdur dedikde gıbbe’s-suâl mezbûr Mustafa Çelebi cevâbında meblağ-ı mezbûr yirmi beş guruşu merkūm Molla İbrahim’e ber-vech-i muharrer zimmetinde deyni olduğunu ikrâr lâkin mezbûr Molla İbrahim’in fevtini inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Yazıcı mahâllesinde sâkin Ali Beşe b. Mehmed ve Alipaşa-i atik mahâllesinde sâkin Osman Beşe b. Mustafa li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müdde‘iye-i mezbûrenin mûrisi Molla İbrahim b. Ali diyâr-ı Acem’de medîne-i Tebriz muhârebesinde Acıköprü nâm mahâlde târîh-i kitâbdan sekiz ay mukaddem huzûrumuzda şehîden vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fî 26 min-Cumâdelâhire sene 1143. Şuhûdü’l-hâl: Osman Çelebi b. Mehmed, Hasan Çelebi b. Hüseyin, Yusuf Çelebi Süleyman, Mehmed Efendi b. Ahmed, Derviş Mehmed b. İbrahim, Mehmed Çelebi b. Halil, Ali Çelebi b. Mehmed