Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 132 Hüküm no: 92 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi’nin Molla İbrahim’e olan borcunu varisi Ümmü Gülsüm’e ödemesi Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen irsâl olunan Mevlânâ Mehmed Efendi b. İbrahim mahmiye-i İstanbul’da Mimarsinan mahâllesinde sâkin umdetü’l-meşâyihi’l-kirâm Şeyh Mehmed Efendi b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde diyâr-ı Acem’de medîne-i Tebriz’de bundan akdem şehîden vefât eden Molla İbrahim b. Ali’nin li-ebeveyn ammi kızı ve zât-ı rahm cihetinden hasran vârisesi olduğunu iddi‘â edip zâtı ta‘rîf-i şer‘î ile mu‘arrefe bâ‘isetü’l-kitâb Ümmü Gülsüm Hatun bt. Abdullah meclis-i ma‘kūd-ı mezkûrda müteveffâ-yı mezbûrun medyûnu olup mahâlle-i mezbûrede sâkin Mustafa Çelebi b. Hasan mahzarında üzerine da‘vâ ve takrîr-i kelâm edip müteveffâ-yı mezbûrun babası Ali ile benim babam Abdullah li-ebeveyn karındaşlar olup babaları ismi Ömer ve dedeleri ismi Osman ve vâlideleri ismi Âişe bt. Abdullah ve maskat-ı re’sleri vilâyet-i Anadolu’da Sinob kazâsı olup müteveffâ-yı mezbûrun verâseti cihet-i mezbûreden bana ve benden gayrı vâris ve terekesine âhar müstahak olmamağla mezbûr Mustafa Çelebi zimmetinde mûrisim müteveffâ-yı mezbûrun cihet-i karz-ı şer‘îden hakkı olan yirmi beş guruşu mezbûr Mustafa Çelebi’den taleb ederim, suâl olunup meblağ-ı mezbûr alıverilmek matlûbumdur dedikde gıbbe’s-suâl mezbûr Mustafa Çelebi cevâbında meblağ-ı merkūm yirmi beş guruş müteveffâ-yı mezbûra ber-vech-i muharrer zimmetinde deyni olduğunu ikrâr lâkin müdde‘iye-i mezbûrenin müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Derviş Ali mahâllesinde sâkin Mehmed Çelebi b. Halil ve Alipaşa-i atik mahâllesinde sâkin Ali Çelebi b. Mehmed li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka müteveffâ-yı mezbûr Molla İbrahim’in babası Ali ile müdde‘iye-i mezbûre Ümmü Gülsüm’ün babası Abdullah li-ebeveyn karındaşlar olup babaları ismi Ömer ve dedeleri ismi Osman ve vâlideleri ismi Âişe bt. Abdullah ve maskat-ı re’sleri vilâyet-i Anadolu’da Sinob kazâsı olup müteveffâ-yı mezbûrun verâseti cihet-i mezbûreden müdde‘iye-i mezbûreye münhasıra ve bundan gayrı vâris ve terekesine âhar müstahak olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ali Çelebi b. Abdullah ve el-Hâc İbrahim b. Hüseyin ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Cumâdelûlâ sene 1143. Şuhûdü’l-hâl: Osman Çelebi b. Mehmed, Hasan Çelebi b. Hüseyin, Yusuf Çelebi b. Süleyman, Şeyh Mehmed Efendi b. Ahmed, Derviş Mehmed b. İbrahim, Mustafa Beşe b. Mehmed