Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 136 Hüküm no: 94 Orijinal metin no: [18b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın nukud vakfına olan borcu konusunda vakıf mütevellisi ile varisler arasında sulh bedeli karşılığı anlaşma sağlandığı Mahmiye-i İstanbul’da Dergâh-ı âlî yeniçerilerinin on yedi sekbânlar odasının mühimmâtına mevkūfe nukūda bi’l-fi‘il mütevellî olan hâfızü’l-kitâb Mehmed Odabaşı b. Mustafa meclis-i şer‘-i şerîf-i enverde mahrûse-i Galata’ya tâbi‘ kasaba-i Beşiktaş’da Hatuniye mahâllesi ahâlîsinden olup vilâyet-i Anadolu’da Niksar kasabasında misâfir olduğu hâlde bundan akdem vefât eden el-Hâc Mustafa Ağa b. Sarıca Mehmed’in zevce-i menkûha-i metrûkesi ve sulbiye sagīre kızı Hadîce’nin vâlidesi ve tesviye-i umûruna vasiyy-i mansûbesi olup zâtı ta‘rîf-i şer‘î ile mu‘arrefe ve tereke-i müteveffâ-yı mezbûra bi’l-verâse ve bi’l-vesâye vâzı‘atü’l-yed olan Rahime Hatun bt. Ömer mahzarında bi’t-tevliye ikrâr ve takrîr-i kelâm edip müteveffâ-yı mezbûr el-Hâc Mustafa Ağa b. Sarıca Mehmed b. Abdullah zimmetinde yedimde olan bin yüz otuz sekiz senesi Muharremi’nin on altıncı günü târîhi ile müverrah mümzâ ve mahtûm işbu deyn temessükü mûcebince yüz on beş guruş mâl-ı vakf olup ve meblağ-ı mezbûr mukābelesinde işbu mu‘âyene olunan bir sîm kemer raht ve bir sîm gaddâre ve bir sîm debbûsunu bana rehn ü teslîm ben dahi ahz u kabz eylediğimden sonra meblağ-ı mezbûrun yetmiş üç guruşu müteveffâ-yı mezbûrun ulûfesinden bana vâsıl olup meblağ-ı bâkī kırk iki guruşu kable’l-edâ ve’l-fek fevt olmağla meblağ-ı bâkī-i mezbûru terekesinden edâ ve fekk-i rehn olmak murâdımdır deyü mezbûre Rahime Hatun’dan taleb eylediğimde ol dahi inkâr edip ben müdde‘âmı Ömer Odabaşı b. Mahmud ve diğer Ömer Odabaşı b. Veliyüddin şehâdetleriyle vech-i şer‘î üzere isbât edip yemîn etmek sadedinde iken beynimize muslihûn tavassut edip meblağ-ı bâkī-i mezbûr kırk iki guruşun on iki guruşundan fedâen li’l-yemîn fâriğ olup bana otuz guruş vermek üzere beni mezbûre Rahime Hatun ile sulh ettiklerinde, sulh sagīre-i mezbûre hakkında enfa‘ olmağla ben dahi sulh-ı mezbûru kabûl ve meblağ-ı mezbûr otuz guruşu mezbûre Rahime Hatun yedinden terekeden olmak üzere tamâmen ahz u kabz ve rihân-ı merkūmeyi işbu meclis-i şer‘de merkūme Rahime Hatun’a def‘ ve teslîm ol dahi kabz ve tesellüm eyledi, ba‘de’l-yevm husûs-ı mezbûra müte‘allıka verese-i müteveffâ-yı mezbûr ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 min-Cumâdelâhire sene 1143. Şuhûdü’l-hâl: Es-seyyid Mustafa Efendi b. Mehmed Efendi, Abdülkadir Efendi b. Abdullah Efendi, Ahmed Çelebi b. Hasan, Mustafa Çelebi b. el-Hâc Hasan