Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 143 Hüküm no: 96 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin cariyesi Şahbaz’ın vefatından sonra hür olması hususunda ikrarı olduğu Itk-ı âtiyede sebk-ı da‘vâ şart olmadığına binâen mahmiye-i İstanbul’da Aydın Kethüdâ mahâllesi sükkânından Mehmed Beşe b. Abdullah ve Mehmed Çelebi b. Ali ve İbrahim Çelebi b. Hasan meclis-i şer‘-i şerîf-i enverde mahâlle-i mezbûre ahâlîsinden olup medîne-i Tebriz defterdârı iken ma‘zûlen esnâ-i tarîkde bundan akdem vefât eden Hasan Efendi b. Hüseyin’in sulbiye-i kebîre kızı Fâtıma Hatun tarafından husûs-ı âti’l-beyanda vekîl olduğu zât-ı mezbûreyi ma‘rifet-i şer‘iyye ile ârifân Mustafa Efendi b. Hüseyin Efendi ve Osman Çelebi b. Ali şehâdetleriyle mahzar-ı hasm-ı câhidde sâbit ve sübût-ı vekâletine hükm-i şer‘î lâhık olan Mustafa Efendi b. Abdullah mahzarında şöyle edâ-i şehâdet-i şer‘iyye-i hasbiye eylediler ki, müteveffâ-yı mezbûr Hasan Efendi b. Hüseyin b. Abdullah hâl-i kemâl-i sıhhatinde fevtinden dört sene mukaddem cemî‘ mülkümde olan abîd ve câriyelerim mâlımdan âzâd olsun deyü huzûrumuzda ikrâr ve bizi işhâd edip hîn-i ikrârında orta boylu açık kaşlı mâî gözlü Moskoviyyetü’l-asl Müslimetü’l-millet bâ‘isetü’l-kitâb Şahbaz bt. Abdullah yedinde câriye-i memlûke olmağla mevsûfe-i mezbûre Şahbaz sâir harâir-i asliyât gibi hürre olmuşdur, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i mezbûre Şahbaz’ın ıtkına ba‘de’l-hükm mâ-vaka‘a bi’t-taleb ketb olundu. Fî-gurreti Cemâziyelâhire sene 1143. Şuhûdü’l-hâl: Ebubekir Ağa b. İbrahim, Mehmed Ağa b. İbrahim, Ali Çavuş Ağa b. Halil, el-Hâc İbrahim b. Hüseyin, Hasan Ağa b. İbrahim, Ahmed Çelebi b. Hasan