Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 145 Hüküm no: 98 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mora’da vefat eden Taşçızade Mehmed Ağa’nın terekesini getirmek üzere İbrahim Ağa’nın vekil tayin edildiği Husûs-ı âti’z-zikrin mahâllinde ketb ü tahrîri için savb-ı şer‘-i şerîf-i enverden Mevlânâ Eminzâde Derviş Mehmed Efendi irsâl olunup ol dahi mahmiye-i İstanbul’da Debbâğ Yunus mahâllesinde sâkine Fâtıma Hanım ibneti’l-merhûm Mehmed Ağa’nın menziline varıp zeyl-i vesîkada muharrerü’l-esâmi Müslimîn huzûrlarından akd-i meclis-i şer‘-i şerîf ettikde mahâlle-i mezbûre ahâlîsinden olup vilâyet-i Rumeli’nde Mora cezîresinde Benefçe kal‘asında sâkin Dergâh-ı âlî yeniçerilerinin dokuzuncu cemâ‘at odası neferâtının çorbacısı olup kal‘a-i mezbûrede misâfiren sâkin iken bundan akdem vefât eden Taşçızâde Mehmed Ağa b. Abdullah Ağa’nın verâseti zevce-i menkûha-i metrûkesi mezbûre Fâtıma Hanım ile evlâd-ı sıgārı Halil Ağa ve Abdullah Ağa ve Mehmed Emin Ağa ve vâlidesi Saliha Hanım ibneti’l-merhûm diğer Mehmed Ağa’ya münhasıra olduğu şer‘an zâhir ve mütehakkık oldukdan sonra sıgār-ı mezbûrûnun vâlideleri ve tesviye-i emrlerine kıbel-i şer‘den mansûbe vasiyyeleri olup zâtı Mehmed Ağa b. İbrahim Ağa ve el-Hâc İsmail Ağa b. Abdullah ta‘rîfleriyle mu‘arrefe olan mezbûre Fâtıma Hanım asâleten ve vesâyeten verâseti kezâlik mu‘arrefân-ı mezbûrân Mehmed Ağa ve el-Hâc İsmail Ağa ta‘rîfleriyle mu‘arrefe olan mezbûre Saliha Hanım asâleten meclis-i ma‘kūd-ı mezbûrda mahmiye-i mezbûrede Hocapaşa mahâllesi ahâlîsinden işbu bâ‘isü’l-kitâb İbrahim Ağa b. Ahmed mahzarında her biri bi’l-asâle ve bi’l-vesâye ikrâr ve takrîr-i kelâm edip mûrisimiz müteveffâ-yı mezbûr Taşçızâde Mehmed Ağa’nın hîn-i fevtinde yanında mevcûd olan eşyâ ve gallâtını ve sâir terekesine kal‘a-i mezbûrede vâzı‘ü’l-yed olanlardan taleb ve da‘vâ ve ahz u kabz ve lede’l-iktizâ sulh ve ibrâya tarafımıza îsâle ve bunlar mutavakkıf olduğu umûrun küllîsine tarafımızdan mezbûr İbrahim Ağa’yı vekîl ve nâib-i menâb nasb ve ta‘yîn eyledik dediklerinde ol dahi ber-vech-i muharrer vekâlet-i mezbûreyi kabûl ve merâsimini kemâ-yenbağī edâya ta‘ahhüd ve iltizâm eylediğini mevlânâ-yı mezbûr mahâllinde tahrîr ve ma‘an mürsel Molla İbrahim b. Ahmed ve Ahmed Çelebi b. İsmail ile. Fî 12 Cumâdelâhir sene 1143. Şuhûdü’l-hâl: Mahmud Ağa b. Abdullah, Ebubekir Ağa b. Yakub, Mustafa Ağa b. Yusuf, Mehmed Ağa b. Süleyman, Mehmed Beşe b. Hasan, Hasan Çelebi b. Mehmed