Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 145 Hüküm no: 99 Orijinal metin no: [20b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Merhan’ın vefat eden Ahmed Ağa’daki alacağının terekeden tahsili Husûs-ı âti’l-beyanın mahâllinde ketb ü tahrîri iltimâs olunmağın savb-ı şer‘-i enverden Mevlânâ Salih Efendi irsâl olunup ol dahi mahmiye-i İstanbul’da Süleymaniye kurbünde Kâtib Şemseddin mahâllesi ahâlîsinden olup vilâyet-i Anadolu’da Türkmân içinde Üzeyr nâm kasabada sâkin iken bundan akdem vefât eden Hânende Ahmed Ağa b. Abdurrahman’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde, sarrâf tâifesinden işbu bâ‘isü’s-sifr Kirkor v. Merhan nâm zimmî meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi ve sulbî sagīr oğlu Ali’nin vâlidesi ve tesviye-i umûruna bâ-hüccet-i şer‘iyye mansûbe vasiyyesi olmağla terekesine bi’l-verâse ve bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Ümmü Gülsüm Hatun bt. Süleyman ile müteveffâ-yı mezbûrun sulbiye kızı Emine nâm bikr-i bâliğa mahzarlarında ikrâr ve takrîr-i kelâm edip müteveffâ-yı mezbûr Hânende Ahmed Ağa b. Abdurrahman b. Abdullah zimmetinde işbu yedimde olan bin yüz kırk iki senesi Zilka‘desinin onuncu günü târîhiyle müverrah mümzâ ve mahtûm deyn temessükü mûcebince cihet-i karz-ı şer‘îden beş yüz kırk guruş hakkım olup meblağ-ı mezbûrun yüz guruşu müteveffâ-yı mezbûrun hayâtında yedinden ahz u kabz edip mâ‘adâ dört yüz kırk guruşu kable’l-edâ fevt olmağla terekesinden taleb eylediğimde mezbûretân Ümmü Gülsüm Hatun ve Emine dahi bi’l-külliye inkâr etmekle ben müdde‘âma işbu Koğacı Mehmed Çelebi b. İbrahim’i şâhid ikāmet edip şâhid-i âhar ikāmeti sadedinde iken beynimize muslihûn tavassut edip da‘vâ-i mezbûremden beni üç yüz guruş üzerine inşâ-i akd-i sulh eylediklerinde, sulh-ı mezbûr sagīr-i mezbûr hakkında her vechile enfa‘ olmağla ben dahi sulh-ı mezbûru kabûl ve bedel-i sulh olan meblağ-ı mezbûr üç yüz guruşu mezbûretân Ümmü Gülsüm Hatun ve Emine yedlerinden bi’t-tamâm ve’l-kemâl alıp kabz eyledim min-ba‘d bedel-i sulh olan meblağ-ı mezbûr üç yüz guruşdan mezbûretân yedlerinde ve zimmetlerinden bir akçe ve bir habbe bâkī kalmayıp bâkī yüz kırk guruşa müte‘allıka âmme-i de‘âvî ve mutâlebât ve eymân ve muhâsamâtdan mezbûretân Ümmü Gülsüm Hatun ve Emine ile sagīr-i mezbûr Ali’nin zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Molla Ahmed b. Abdullah ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’s-sâmin min-Cumâdelâhire sene 1143. Şuhûdü’l-hâl: el-Hâc Mehmed Ağa b. Mustafa yağlıkçı, Abdullah Çelebi b. Abdullah, es-Seyyid el-Hâc Abdullah b. Mehmed, es-Seyyid Mahmud Çelebi b. Ali, Ahmed Efendi b. Abdullah.