Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 149 Hüküm no: 102 Orijinal metin no: [21a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hanende Ahmed Ağa’nın varislerinin Hatice Hanım’daki alacağını tahsil ettikleri Husûs-ı âti’l-beyanın mahâllinde ketb ü tahrîri için savb-ı şer‘i’l-enverden Mevlânâ Salih Efendi irsâl olunup ol dahi mahmiye-i İstanbul’da Süleymaniye kurbünde Kâtib Şemseddin mahâllesi ahâlîsinden olup vilâyet-i Anadolu’da Türkmân içinde Üzeyr nâm kasabada sâkin iken bundan akdem vefât eden Hânende Ahmed Ağa b. Abdurrahman’ın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkesi Ümmü Gülsüm Hatun b. Süleyman ile sulbiye kebîre kızı Emine nâm bikr-i bâliğaya ve sulbî sagīr oğlu Ali’ye münhasıra oldukdan sonra sagīr-i mezbûrun vâlidesi ve tesviye-i umûruna bâ-hüccet-i şer‘iyye mansûb veliyesi olup zâtı ta‘rîf-i şer‘i ile mu‘arrefe olan mezbûre Ümmü Gülsüm Hatun asâleten ve vesâyeten zâtı kezâlik ta‘rîf-i şer‘î ile mu‘arrefe olan mezbûre Emine dahi asâleten meclis-i ma‘kūd-ı mezbûrda mârrü’z-zikr Süleymaniye mahâllesinde sâkine Hadîce Hanım bt. Hüseyin Ağa’nın oğlu ve tarafından müseccel vekîli işbu bâ‘isü’l-kitâb Mustafa Ağa b. Bahri Mehmed Ağa mahzarında her biri bi’l-asâle ve bi’l-vesâye ikrâr ve takrîr-i kelâm edip mûrisimiz müteveffâ-yı mezbûrun işbu yedimizde olan iki kıt‘a deyn temessükü mûcebince müvekkile-i mezbûre Hadîce Hanım zimmetinde iki yüz guruş hakkı olmağla meblağ-ı mezbûr iki yüz guruşun dokuz guruşunu müteveffâ-yı mezbûr hayâtında mezbûre Hadîce Hanım’dan ahz u kabz edip bâkī yüz altmış beş guruşunu vekîl-i mezbûr Mustafa Ağa işbu meclisde bize def‘ u teslîm biz dahi tereke-i müteveffâ-yı mezbûrdan olmak üzere yedinden asâlet ve vekâletim hasebiyle bi-kadri’l-hısas tamâmen alıp kabz eyledik min-ba‘d meblağ-ı mezbûr yüz altmış beş guruşdan müvekkile-i mezbûre Emine ve vekîl-i mezbûr yedlerinde ve zimmetlerinde bir akçe ve bir habbe bâkī kalmayıp mâ‘adâ yirmi altı guruş mutâlebesinden müvekkile-i mezbûre Hadîce Hanım ile vekîl-i mezbûr Mustafa Ağa’nın zimmetlerini bi’l-asâle ibrâ-i âmm-ı kātı‘ü’n-nizâ‘la ibrâ ve ıskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an mürsel Ahmed Çelebi b. Abdullah [ve] Mustafa Çelebi b. Hasan ile meclis-i şer‘a varıp alâ-vuku‘ihî inhâ ve tahrîr etmeğin mâ-vaka‘a bi’t-taleb ketb olundu. Fî 2 min-Cemâziyelâhire sene 1143. Şuhûdü’l-hâl: Süleyman Efendi b. Mustafa, es-Seyyid el-Hâc Abdullah b. es-Seyyid Mehmed, Mehmed Beşe b. Ali, el-Hâc Mehmed b. el-Hâc Hüseyin, Abdurrahman b. Abdullah, es-Seyyid Mehmed b. Ali, Ali b. Mustafa.