Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 156 Hüküm no: 105 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacaklıların vefat eden Turşucu Ahmed Odabaşı Ağa’daki haklarının terekeden ödenmesi talepleri Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen Mevlânâ İskilibî Mehmed Efendi irsâl olunup ol dahi mahmiye-i İstanbul’da Mesih Alipaşa mahâllesinde sâkin iken bundan akdem vefât eden Turşucu Ahmed Odabaşı Ağa b. Abdullah’ın menziline varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i şerîf ettikde yağlıkçı tâifesinden işbu bâ‘isü’l-kitâb es-Seyyid Ahmed Ağa b. el-Hâc Mehmed meclis-i ma‘kūd-ı mezkûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan Süleyman Ağa b. Ali mahzarında üzerine da‘vâ ve takrîr-i kelâm edip müteveffâ-yı mezbûr Turşucu Ahmed Odabaşı b. Abdullah b. Abdullah zimmetinde beynimizde ma‘lûm yağlıkçı metâ‘ı semeninden ba‘de-külli’l-hesâb iki bin yüz altmış akçe hakkım olup hattâ müteveffâ-yı mezbûr hâl-i hayâtında fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr yine mahâlle-i mezbûrede sâkin el-Hâc İbrahim b. Mehmed meclis-i ma‘kūd-ı mezkûrda vasiyy-i mezbûr Süleyman Ağa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Abdullah b. Abdullah zimmetinde cihet-i deyn-i şer‘îden bin dört yüz kırk akçe hakkım olup hattâ müteveffâ-yı mezbûr hâl-i hayâtında fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr yine Hoca Hayreddin mahâllesinde sâkin Hüseyin Odabaşı Ağa b. Mehmed meclis-i ma‘kūd-ı mezbûrda vasiyy-i mezbûr Süleyman Ağa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Abdullah b. Abdullah zimmetinde cihet-i deyn-i şer‘îden altı yüz akçe hakkım olup hattâ müteveffâ-yı mezbûr hâl-i hayâtında fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr mârrü’z-zikr Hoca Hayreddin mahâllesinde sâkin es-Seyyid Mehmed Çelebi b. es-Seyyid Ahmed mecils-i ma‘kūd-ı mezbûrda vasiyy-i mezbûr Süleyman Ağa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Abdullah b. Abdullah zimmetinde cihet-i karz-ı şer‘îden üç yüz altmış akçe hakkım olup hattâ müteveffâ-yı mezbûr hâl-i hayâtında fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr yine Unkapanı kurbünde Garibler mahâllesinde sâkin el-Hâc Yasin b. el-Hâc Mehmed meclis-i ma‘kūd-ı mezbûrda vasiyy-i mezbûr Süleyman Ağa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Abdullah b. Abdullah zimmetinde cihet-i deyn-i şer‘îden altı yüz akçe hakkım olup hattâ müteveffâ-yı mezbûr hâl-i hayâtında fevtinden üç [ay] mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr yine Molla Ahaveyn mahâllesinde sâkin Ahmed Beşe b. Mehmed meclis-i ma‘kūd-ı mezbûrda vasiyy-i mezbûr Süleyman Ağa mahzarında üzerine da‘vâ ve takrîr-i kelâm edip müteveffâ-yı mezbûr Ahmed Odabaşı b. Abdullah b. Abdullah zimmetinde vezn ve kıymeti beynimizde ma‘lûm lahana bahasından ba‘de-külli’l-hesâb üç bin üç yüz yetmiş akçe hakkım olup hattâ müteveffâ-yı mezbûr hâl-i hayâtında fevtinden üç ay mukaddem meblağ-ı mezbûr cihet-i merkūmeden zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘ûn-ı mezbûrûndan müdde‘âlarına beyyine taleb olundukda udûl-i ahrâr-ı ricâl-i Müslimînden olup ve Bereketzâde mahâllesinde sâkin Yusuf Efendi b. Abdurrahman ve Halil Beşe b. Süleyman ve mârrü’z-zikr Hoca Hayreddin mahâllesinde sâkin el-Hâc es-Seyyid Mustafa b. es-Seyyid Mehmed ve Mehmed Beşe b. Ali ve Salih Çelebi b. Halil ve Mustafa Beşe b. Ahmed li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Turşucu Ahmed Odabaşı b. Abdullah b. Abdullah hâl-i hayâtında fevtinden üç ay mukaddem müdde‘î-i evvel mezbûr es-Seyyid Ahmed Ağa’ya beynlerinde ma‘lûm yağlıkçı metâ‘ı semeninden ba‘de-külli’l-hesâb iki bin yüz altmış ve müdde‘î-i sânî mezbûr el-Hâc İbrahim cihet-i deyn-i şer‘îden bin dört yüz kırk akçe ve müdde‘î-i sâlis mezbûr Hüseyin Odabaşı Ağa’ya cihet-i deyn-i şer‘îden altı yüz akçe ve müdde‘î-i râbi‘ mezbûr es-Seyyid Mehmed Çelebi’ye cihet-i karz-ı şer‘îden üç yüz altmış akçe ve müdde‘î-i hâmis mezbûr el-Hâc Yasin Ağa’ya cihet-i deyn-i şer‘îden altı yüz akçe ve müdde‘î-i sâdis mezbûr Ahmed Beşe’ye vezn ve kıymetleri beynimizde ma‘lûm lahana bahasından ba‘de-külli’l-hesâb üç bin üç yüz yetmiş akçe zimmetinde vâcibü’l-edâ deyni olduğunu huzûrumuzda ikrâr ve bizi işhâd ve beyan eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘ûn-ı mezbûrûndan her biri vech-i şer‘î üzere tahlîf olunup mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ve ma‘an mürsel Hüseyin Çelebi b. Ahmed ve Abdullah b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Cumâdelûlâ sene 1143. Şuhûdü’l-hâl: Derviş Mehmed Efendi b. Mehmed Emin, el-Hâc Hasan Efendi b. Ali, Hâfız Mehmed Efendi b. Abdülfettah, Hâfız Mehmed Efendi b. el-Hâc Murtaza, Mehmed Ağa b. Abdullah, İbrahim Beşe b. Mahmud, Hüseyin Beşe b. Mahmud, es-Seyyid İbrahim Çelebi b. es-Seyyid Sadık, es-Seyyid el-Hâc Mehmed Ağa b. Mustafa, Hüseyin Ağa b. Ahmed, Abdullah Çelebi b. Abdullah, Mustafa Odabaşı b. Hasan, Halil Odabaşı b. Hüseyin, Hüseyin Beşe b. Hasan