Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 158 Hüküm no: 106 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Hasan Ağa’nın varisi olan oğlu Ahmed’in Turşucu Ahmed Odabaşı’daki hakkının terekeden alındığı Kezâlik akd-i meclis-i şer‘-i şerîf ettikde mahmiye-i mezbûrede Hoca Hayreddin mahâllesi ahâlîsinden olup vilâyet-i Anadolu’da Mihaliç kasabasında serdâr iken fevt olan Çorbacı Hasan Ağa b. Abdullah’ın sulbî sagīr oğlu Ahmed’in tesviye-i umûruna kıbel-i şer‘den mansûb hâlâ vasîsi olan işbu bâ‘isü’l-kitâb Hüseyin Odabaşı Ağa b. Mehmed meclis-i ma‘kūd-ı mezbûrda müteveffâ-yı mezbûr Ahmed Odabaşı’nın sulbiye sagīre kızları Âişe ve Hadîce’nin tesviye-i umûrlarına bâ-hüccet-i şer‘iyye vasiyy-i muhtârları olmağla terekesine bi’l-vesâye vâzı‘ü’l-yed olan Süleyman Ağa b. Ali mahzarında bi’l-vesâye üzerine da‘vâ ve takrîr-i kelâm edip bin yüz kırk üç senesi Saferi’l-hayrı gurresi târîhiyle müverrah işbu muhâsebe defteri mûcebince vasîsi olduğum sagīr-i mezbûr Ahmed’in babası müteveffâ-yı mezbûr Çorbacı Hasan Ağa’nın terekesinden hissesine isâbet eden bin üç buçuk guruş ile sagīr-i mezbûrun yeniçeri ulûfesinden makbûzu olan yirmi guruş ki cem‘an bin yirmi üç buçuk guruşu müteveffâ-yı mezbûr Turşucu Ahmed Odabaşı b. Abdullah b. Abdullah sagīr-i mezbûrun vasîsi olmağla meblağ-ı mecmû‘-ı mezbûr bin yirmi üç buçuk guruşu kabz ve masârıfına sarf ile istihlâk edip hattâ müteveffâ-yı mezbûr Turşucu Ahmed Odabaşı hâl-i hayâtında târîh-i muhâsebede sagīr-i mezbûra meblağ-ı mecmû‘-ı mezbûru bi’l-vesâye taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Karagümrük kurbünde Karabaş mahâllesinde sâkin Salih Çelebi b. Halil ve Bereketzâde mahâllesinde sâkin Mustafa Beşe b. Ahmed ve Halil Odabaşı b. Hüseyin ve Gül Câmi‘-i şerîfi Hatîbi el-Hâc Hasan Efendi b. Ali ve el-Hâc İbrahim b. Mehmed li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-hakīka müteveffâ-yı mezbûr Turşucu Ahmed Odabaşı b. Abdullah b. Abdullah hâl-i hayâtında bin yüz kırk üç senesi Saferi’l-hayrı gurresi târîhiyle müverrah işbu muhâsebe defteri mûcebince müdde‘î-i mezbûr Hüseyin Odabaşı Ağa’nın vasîsi olduğum sagīr-i mezbûr Ahmed’in babası müteveffâ-yı mezbûr Çorbacı Hasan Ağa’nın terekesinden sagīr-i mezbûrun hissesine isâbet eden bin üç buçuk guruş ile sagīr-i mezbûr Ahmed’in yeniçeri ulûfesinden makbûzu olan yirmi guruş ki cem‘an bin yirmi üç buçuk guruşu müteveffâ-yı mezbûr Şorbacı Ahmed Odabaşı târîh-i muhâsebede meblağ-ı mecmû‘-ı mezbûru <> bi’l-vesâye kabz ve masârıfına sarf ile istihlâk edip sagīr-i mezbûra meblağ-ı mecmû‘-ı mezbûr zimmetinde vâcibü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın vasiyy-i mezbûr Hüseyin Odabaşı Ağa’nın husûs-ı mezkûrda sun‘u olmayıp yemîn dahi teveccüh etmemekle mûcebiyle ba‘de’l-hükm vasiyy-i mezbûr Hüseyin Odabaşı Ağa meclis-i ma‘kūd-ı mezbûrda vasiyy-i mezbûr Süleyman Ağa mahzarında bi’l-vesâye ikrâr ve takrîr-i kelâm edip ânifen edâsına hükm-i şer‘î lâhık olan meblağ-ı mecmû‘-ı mezbûr bin yirmi üç buçuk guruşu müteveffâ-yı mezbûr Turşucu Ahmed Odabaşı’nın terekesinden olmak üzere vasiyy-i mezbûr Süleyman Ağa yedinden tamâmen alıp kabz eyledim min-ba‘d meblağ-ı mecmû‘-ı mezbûr bin yirmi üç buçuk guruşdan vasiyy-i mezbûr Süleyman Ağa yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn