Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 159 Hüküm no: 107 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saide ve Emine adlı Acem asıllı cariyelerin azat edildiği Itk-ı âtiyede sebk-ı da‘vâ şart olmadığına binâen mahmiye-i İstanbul’da Haydarpaşa mahâllesinde sâkin Abdullah Efendi b. Mehmed ve Şeyh Muhyiddin Foçavî mahâllesinde sâkin el-Hâc Mustafa b. el-Hâc Ali meclis-i şer‘-i hatîr-i lâzımü’t-tevkīrde mahmiye-i mezbûrede Üskübî mahâllesinde sâkin iken bundan akdem vefât eden Tütüncü Moralı el-Hâc Mustafa b. Aziz’in li-ebeveyn kız karındaşı ve sulbî sagīr oğlu Mehmed ve sulbiye sagīre kızı Hadîce’nin tesviye-i emrlerine bâ-hüccet-i şer‘iyye vasiyy-i muhtârları olmağla zikri âtî câriyeye rık olup terekeden olmak üzere bi’l-vesâye vâzı‘atü’l-yed olup zâtı ta‘rîf-i şer‘î ile mu‘arrefe olan Âişe Hatun ile müteveffâ-yı mezbûrun zevce-i menkûha-i metrûkesi olup zâtı kezâlik ta‘rîf-i şer‘î ile mu‘arrefe olan Meryem Hatun bt. Hüseyin mahzarlarında her biri şöyle edâ-i şehâdet-i hasbiye eylediler ki, müteveffâ-yı mezbûr Moralı el-Hâc Mustafa b. Aziz b. Ali hayâtında târîh-i fevtinden sekiz gün mukaddem yedinde câriye-i memlûkesi olan orta boylu kara kaşlı kara gözlü Acemiyyetü’l-asl Müslimetü’l-millet bâ‘isetü’l-kitâb Saide bt. Abdullah’ı huzûrumuzda tedbîr-i mutlak ile müdebbere edip fevt oldukda terekesinin sülüsü mevsûfe-i mezbûrenin fetâ kıymetinin sülüsüne müsâ‘id olmağla mevsûfe-i mezbûre Saide sâir harâir-i asliyât gibi hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye-i hasbiye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Cumâdelûlâ sene 1143. Şuhûdü’l-hâl: el-Hâc Mustafa b. Mehmed, Ali Çelebi b. Aziz, Molla Mehmed b. Hasan, es-Seyyid Ebu Bekir Çelebi b. es-Seyyid Ali, el-Hâc İbrahim b. Hüseyin, Ahmed Çelebi b. Hasan Kezâlik mezbûrân el-Hâc Mustafa b. el-Hâc Ali ve Abdullah Efendi b. Mehmed şehâdetleriyle orta boylu kara kaşlı kara gözlü Acemiyyetü’l-asl Müslimetü’l-millet bâ‘isetü’l-kitâb Emine bt. Abdullah’ın tedbîr-i mutlak ile müdebbere olduğuna ba‘de’l-hükm mâ-vaka‘a bi’t-taleb ketb olundu. Fi’t-târîhi’l-mezbûr li-seneti’l-merkūme. Şuhûdü’s-sâbıkūn