Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 165 Hüküm no: 111 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteciler Kethüdası Ahmed Ağa’nın hayattayken Muammer adlı cariyesi ile oğlu Yusuf’u azat ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Sadi Ali Efendi irsâl olunup ol dahi mahmiye-i İstanbul’da Hoca Paşa mahâllesinde umdetü’l-a‘yân İsmail Efendi b. el-Hâc İbrahim’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı âti’z-zikre rıkk-ı sâbıkı mu‘terife işbu orta boylu kara gözlü kara kaşlı Gürciyetü’l-asl Müslimetü’l-millet bâ‘isetü’l-kitâb Muammere bt. Abdullah meclis-i ma‘kūd-ı mezkûrda mahmiye-i mezbûrede Vâlidehanı kurbünde Dâye Hatun mahâllesinde sâkin iken bundan akdem vefât eden sâbıkā Keresteciler Kethüdâsı el-Hâc Ahmed Ağa b. el-Hâc Hüseyin’in li-ebeveyn kız karındaşı olmağla rık olup terekeden olmak üzere kendüye bi’l-verâse vâzı‘atü’l-yed olan Hâce Rukıye Hatun tarafından müseccel vekîli Ali Efendi b. Ali ile müteveffâ-yı mezbûrun vâlidesi Emetullah Hatun bt. el-Hâc Mustafa tarafından dahi kezâlik müseccel vekîli olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa mahzarlarında üzerlerine da‘vâ ve takrîr-i kelâm edip seyyidim merhûm-ı mezbûr Keresteciler Kethüdâsı el-Hâc Ahmed Ağa b. el-Hâc Hüseyin b. Hasan hâl-i kemâl-i sıhhatinde fevtinden dört sene mukaddem yedinde câriye-i memlûkesi olduğum hâlde beni ve yedinde abd-i memlûkü olan oğlum işbu sagīr Yusuf’u hasbeten lillâhi te‘âlâ huzûr-ı Müslimînde mâlından tahrîr ve i‘tâk ve silk-i harâir-i asliyâta idrâc ve ilhâk etmekle ben ve oğlum sagīr-i mezbûr Yusuf sâir harâir-i asliyât gibi hürre olmuş iken vekîlân-ı mezbûrân bize rık olup terekeden olmak üzere bi-gayrı hakkın vaz‘-ı yed ederler suâl olunup sebîlimiz tahliye olunmak matlûbumdur dedikde gıbbe’s-suâl ve’l-inkâr mevsûfe-i mezbûreden sıdk-ı makālına beyyine taleb olundukda udûl-i ahrâr-ı ricâl-i Müslimînden zikr olunan Dâye Hatun mahâllesi sükkânından Süleyman b. Abdullah ve Molla Ali b. Hasan ve Mustafa Çelebi b. Hasan li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr sâbıkā Keresteci Kethüdâsı el-Hâc Ahmed Ağa b. el-Hâc Hüseyin b. Hasan hâl-i kemâl-i sıhhatinde fevtinden dört sene mukaddem işbu mevsûfe-i mezbûre Muammere’yi yedinde câriye-i memlûkesi olduğu hâlde ve mezbûre Muammere’nin oğlu olup kezâlik yedinde abd-i memlûkü olan işbu sagīr Yusuf’u hasbeten lillâhi te‘âlâ huzûrumuzda mâlından tahrîr ve i‘tâk ve silk-i harâir-i asliyâta idrâc ve ilhâk etmekle mevsûfe-i mezbûre Muammere ve oğlu işbu sagīr-i mezbûr Yusuf sâir harâir-i asliyât gibi hürre olmuşlardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan [24b] Ali Çelebi b. İbrahim ve diğer Ali Çelebi b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 Cemâziyelâhire sene 1143. Şuhûdü’l-hâl: Es-Seyyid Abdullah Çelebi b. Mustafa, İsmail Efendi b. el-Hâc İbrahim, Süleyman Bey b. Hasan Ağa, Abdullah Efendi b. Hüseyin, Halil Ağa b. Mehmed, Mehmed Çelebi b. Osman.