Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 170 Hüküm no: 116 Orijinal metin no: [25a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmü Gülsüm Hatun’un vefatından önce mehrini kocasına hibe ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Salih Efendi irsâl olunup ol dahi mahmiye-i İstanbul’da Oruç Gāzî mahâllesinde sâkine iken bundan akdem vefât eden Ümmü Gülsüm Hatun bt. el-Hâc Mahmud Ağa’nın menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffât-ı mezbûrun verâseti zevc-i metrûkü Mehmed Ağa b. Hüseyin ile min-kıbeli’l-üm ceddesi Âişe Hatun bt. Abdullah ve li-ebeveyn er karındaşı sagīr Molla Mehmed’e münhasıra ve tashîh-i meselesi altı sehmden olup sihâm-ı mezbûrenin üç sehmi mezbûr Mehmed Ağa’ya ve bir sehmi mezbûre Âişe Hatun’a ve bâkī iki sehmi karındaşı mezbûr Molla Mehmed’e isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Âişe Hatun asâleten ve sagīr-i mezbûr Molla Mehmed’in tesviye-i umûruna bâ-hüccet-i şer‘iyye mansûb vasîsi Abdullah Ağa b. el-Hâc Hüseyin vesâyeten meclis-i ma‘kūd-ı mezkûrda işbu bâ‘isü’l-kitâb mezbûr Mehmed Ağa mahzarında her biri bi’l-asâle ve bi’l-vesâye üzerine da‘vâ ve takrîr-i kelâm edip müteveffât-ı mezbûrenin zevci mezbûr Mehmed Ağa zimmetinde mütekarrer ve ma‘kūdün-aleyh otuz bin akçe mehr-i müeccel hakkı olup kable’l-ahz mezbûre Ümmü Gülsüm Hatun vefât etmekle meblağ-ı mezbûrdan tashîh-i mezbûr üzere hissemize isâbet eden on beş bin akçeyi mezbûr Mehmed Ağa’dan taleb ederiz, suâl olunsun dediklerinde gıbbe’s-suâl mezbûr Mehmed Ağa cevâbında fi’l-hakīka müteveffât-ı mezbûre Ümmü Gülsüm Hatun bt. el-Hâc Mahmud Ağa b. Abdullah hâl-i kemâl-i sıhhatinde fevtinden bir ay mukaddem meblağ-ı mezbûr otuz bin akçeyi huzûr-ı Müslimînde bana hibe-i sahîha-i şer‘iyye ile hibe ve temlîk ben dahi meclis-i hibede ittihâb ve kabûl etmemle ol vechile mehr-i mezbûrdan zimmetim berî olmuşdur deyü def‘le mukābele edicek gıbbe’l-istintâk ve’l-inkâr müdde‘î-i mezbûr Mehmed Ağa’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahâlle-i mezbûr sükkânından Osman Çelebi b. Musa ve Halil Ağa b. Ali li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Ümmü Gülsüm Hatun bt. Mahmud Ağa b. Abdullah hâl-i kemâl-i sıhhatinde fevtinden bir ay mukaddem zevci mezbûr Mehmed Ağa zimmetinde mütekarrer ve ma‘kūdün-aleyh otuz bin akçe mehr-i müeccel hakkını huzûrlarımızda mezbûr Mehmed Ağa’ya hibe-i sahîha-i şer‘iyye ile hibe ve temlîk ol dahi meclis-i hibede ittihâb ve temellük ve kabûl edip ol vechile mehr-i mezbûrdan mezbûr Mehmed Ağa zimmeti berî olmuşdur, biz bu husûsa bu vech üzere şâhidleriz şehâdet dahi [25b] ederiz deyü her biri edâ-i şehâdet-i şer‘iyye ettikde ba‘de’l-kabûl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Mustafa Çelebi b. el-Hâc Hasan ve Ali Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 8 min-Cumâdelâhire sene 1143. Şuhûdü’l-hâl: Es-seyyid Mustafa Çelebi b. es-Seyyid Mahmud, Halil Beşe b. Ali, Abdullah Çelebi b. Abdullah, Ali Çelebi b. Abdullah