Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 169 Hüküm no: 115 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Keresteciler Kethüdası Ahmed Ağa’nın varisleri arasındaki davaya sulh bedeli karşılığı son verildiği Kezâlik akd-i meclis-i şer‘-i şerîf ettikde mahmiye-i mezbûrede Vâlidehanı kurbünde Dâye Hatun mahâllesinde sâkin iken bundan akdem vefât eden sâbıkā Keresteciler Kethüdâsı el-Hâc Ahmed Ağa b. el-Hâc Hüseyin’in verâseti zevce-i menkûha-i metrûkesi Meryem Hatun bt. el-Hâc İbrahim ile vâlidesi Emetullah Hatun bt. el-Hâc Mustafa’ya ve li-ebeveyn kız karındaşı Hâce Rukıye Hatun’a münhasıra ve tashîh-i meselesi bi-hükmi’l-kavl on üç sehmden olmağla sihâm-ı mezbûrenin üç sehmi zevcesi mezbûreye ve dört sehmi vâlidesi merkūmeye ve altı sehmi kız karındaşı mezkûreye isâbeti tahakkukundan sonra mezbûre Emetullah Hatun tarafından ahz u kabz ve sulh ü ibrâya müseccel vekîli olup zâtı ta‘rîf-i şer‘î ile mu‘arrefe olan Fâtıma Hatun bt. Mustafa vekâleten ve mezbûre Hâce Rukıye Hatun tarafından dahi kezâlik ahz u kabz ve sulh ü ibrâya müseccel vekîli olan Ali Efendi b. Ali dahi vekâleten meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezkûre Meryem Hatun mahzarında her biri bi’l-vekâle ikrâr ve takrîr-i kelâm edip müteveffâ-yı mezbûr Keresteciler Kethüdâsı el-Hâc Ahmed Ağa’nın terekesinden mecmû‘u altı yüz elli guruş kıymetli bir mushaf-ı şerîf ve yirmi kadife yasdık ve yedi serenk yasdık ve on minder ve beş şilte ve beş kilim ve bir orta kaliçesi ve üç kırmızı velence ve üç ihrâm ve beş seccâde ve üç yan kilimi ve otuz yorgan ve yirmi tencere ve yetmiş sahan ve yirmi lenger ve iki kazgan ve dört güğüm ve bir bakır musluk ve on kebîr lenger ve yirmi fağfur tabak ve kâse ve bir tuç havan ve bir sîm buhurdan ve gülâbdân ve bir sîm şamdân ve iki sedefli piştahta ve sekiz top bezi ve bir dellâk câriye ve bir mücevher kuşağını mezbûre Meryem Hatun ketm ü ihfâ eyledi deyü mezbûre Meryem Hatun’dan taleb ve da‘vâ eylediğimizde ol dahi bi’l-külliye inkâr eylediğinden mâ‘adâ zevcim müteveffâ-yı mezbûr zimmetinde cihet-i karz-ı şer‘îden iki bin yedi yüz elli guruş hakkım vardır deyü bizden taleb ve da‘vâ edip biz dahi bi’l-külliye inkâr etmekle beynimizde münâza‘ât-ı kesîre vâkı‘a olmuş idi. El-hâletü hâzihi beynimize muslihûn tavassut edip da‘vâ-i mezbûremizden bizi merkūme Meryem Hatun ile yüz seksen guruş üzerine inşâ-i akd-i sulh eylediklerinde biz dahi sulh-ı mezbûru bi’l-vekâle kabûl ve bedel-i sulh olan meblağ-ı mezbûr yüz seksen guruşu mezbûre Meryem Hatun yedinden vekâletimiz hasebiyle bi-kadri’l-hısas bi’t-tamâm ve’l-kemâl alıp kabz eyledik min-ba‘d meblağ-ı mezbûr yüz seksen guruşdan mezbûr Meryem Hatun yedinde ve zimmetinde bir akçe ve bir habbe bâkī kalmayıp müdde‘âmız olan eşyâ-i muharrere-i mezkûre ile câriye-i merkūmeye ve müteveffâ-yı mezbûrun dâhil-i defter-i kassâm ve hâric ez-defter eşyâ ve nukūd ve emlâk ve bi’l-cümle ism-i mâl ıtlâk olunur terekesine müte‘allıka âmme-i de‘âvî ve mutâlebât ve eymân [ve] muhâsamâtdan mezbûre Meryem Hatun’un zimmetini bi’l-vekâle ibrâ-i âmm-ı kātı‘ü’n-nizâ‘la ibrâ ve ıskāt eyledik ve mezbûre Meryem Hatun dahi zevci müteveffâ-yı mezbûrun terekesinden iddi‘â eylediği meblağ-ı mezbûr iki bin yedi yüz elli guruşa ve zevci müteveffâ-yı mezbûrun eşyâ ve nukūd ve emlâk ve bi’l-cümle ismi mâl ıtlâk olunup terekesine müte‘allıka âmme-i de‘âvî ve mutâlebât ve eymân [ve] muhâsamâtdan müvekkilelerim mezbûretân Emetullah Hatun ve Hâce Rukıye Hatun ile bizim zimmetimizi ibrâ-i âmm-ı kātı‘ü’n-nizâ‘la ibrâ ve ıskāt eyledi dediklerinde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn