Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 176 Hüküm no: 118 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Varissiz olarak vefat eden Molla Halil’in alacağının tahsil edildiği Mahmiye-i İstanbul’da Şekerciler Hanı kurbünde Nalband Hasan’ın dükkânında misâfiren sâkin iken bundan [akdem] vefât eden Molla Halil b. Abdullah’ın zâhirde vâris-i ma‘rûfu olmayıp terekesi cânib-i beytülmala âid olmağla mahmiye-i mezbûrede bi’l-fi‘il beytülmalı’l-hâs emîni fahrü’l-akrân es-Seyyid Mustafa Ağa b. el-Hâc Ahmed meclis-i şer‘-i şerîf-i enverde müteveffâ-yı mezbûrun mûrisi işbu bâ‘isü’l-kitâb Habbâz el-Hâc İbrahim b. Ali mahzarında bi’l-emâne ikrâr ve takrîr-i kelâm edip müteveffâ-yı mezbûr hayâtında fevtinden dört ay mukaddem mezbûr el-Hâc İbrahim’e bi-tarîkı’l-emâne sekiz guruş def‘ u teslîm etmekle el-hâletü hâzihi meblağ-ı mezbûr sekiz guruş cânib-i beytülmala âid olmağla meblağ-ı mezbûru mezbûr el-Hâc İbrahim işbu meclis-i şer‘de bana def‘ u teslîm ben dahi tereke-i müteveffâ-yı mezbûrdan olmak üzere yedinden bi’l-emâne alıp kabz eyledim min-ba‘d meblağ-ı mezbûr sekiz guruşdan mezbûr el-Hâc İbrahim yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 min-Cumâdelâhire sene 1143. Şuhûdü’l-hâl: Fahrü’l-küttâb İskilibî Mehmed Efendi, Abdülbaki Efendi, el-Hâc İbrahim b. Osman, el-Hâc Süleyman habbâz, İvaz b. Abdullah, Berber Hasan b. Abdullah, Berber el-Hâc Ahmed, Ahmed Çelebi b. Hasan, Salih Çelebi b. Halil, Hasan b. Mustafa, Ahmed Çelebi b. Mehmed