Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 177 Hüküm no: 119 Orijinal metin no: [26b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un vefatıyla terekeden küçük çocuklarına isabet eden kısmın vasilerine teslim edildiği Husûs-ı âti’l-beyanın mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim irsâl olunup mahmiye-i İstanbul’da Süleymaniye mahâllesi ahâlîsinden umdetü’l-ekâbir ve’l-a‘yân hâlâ Tersâne-i âmire Emîni Mehmed Efendi b. İshak Ağa’nın menziline varıp zeyl-i kitâbda muharrerü’l-esâmi Müslimîn huzûrlarından akd-i meclis-i şer‘-i şerîf ettikde mahâlle-i mezbûrede sâkine iken bundan akdem vefât eden Safiye bt. Abdullah’ın verâseti zevc-i metrûkü Halil Çelebi b. Ali ile sadrî sagīr oğlu İbrahim ve sadriye sagīre kızı Ümmü Gülsüm’e münhasıra ve tashîh-i meselesi dört sehmden olmağla sihâm-ı mezbûrenin bir sehmi zevci mezbûr Halil Çelebi’ye ve iki sehmi sagīr-i mezbûr İbrahim ve bir sehmi sagīre-i mezbûre Ümmü Gülsüm’e isâbeti tahakkukundan sonra sagīrân-ı mezbûrânın tesviye-i emrlerine bâ-hüccet-i şer‘iyye vasiyy-i muhtârları mûmâ-ileyh Mehmed Efendi tarafından husûs-ı âti’l-beyanda vekîl-i sâbitü’l-vekâlesi el-Hâc Abdullah Ağa b. Ahmed meclis-i ma‘kūd-ı mezkûrda müteveffât-ı mezbûrenin zevc-i metrûkü olmağla terekesine bi’l-verâse vaz‘-ı yed eden bâ‘isü’l-kitâb mezbûr Halil Çelebi mahzarında bi’l-vekâle ikrâr ve takrîr-i kelâm edip müvekkilim mûmâ-ileyh Mehmed Efendi’nin vasîleri olduğu sagīrân-ı mezbûrânın vâlideleri müteveffât-ı mezbûrenin terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezkûr üzere sagīrân-ı mezbûrânın hisselerine isâbet eden altmış iki bin beş yüz iki akçeyi terekeden olmak üzere mezbûr Halil Çelebi yedinden vekâletim hasebiyle bi’t-tamâm ve’l-kemâl alıp kabz edip min-ba‘d meblağ-ı mezbûr altmış iki bin beş yüz iki akçeden mezbûr Halil Çelebi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. Hasan ve Salih Çelebi b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 6 min-Cumâdelûlâ sene 1143. Şuhûdü’l-hâl: Halil Beşe b. Ali, Mustafa Çelebi b. Hüseyin, Ahmed Çelebi b. Hasan, Salih Beşe b. Ali, Ahmed Çelebi b. Mehmed, Mustafa Ağa b. Hüseyin