Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 179 Hüküm no: 121 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un Ahmed Efendi’nin terekesindeki haklarını almak üzere Fatıma Hatun’u vekil tayin ettiği Husûs-ı âti’l-beyanın ketb ü tahrîri için bi’l-iltimâs savb-ı şer‘-i enverden Mevlânâ Mustafa Efendi b. Ahmed irsâl olunup ol dahi mahmiye-i İstanbul’da Eski İmâret mahâllesinde sâkine Fâtıma Hatun bt. Mustafa Efendi’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde menzil-i mezbûrda sâkin iken bundan akdem vefât eden Ahmed Efendi b. el-merhûm Mehmed Emin Efendi’nin verâseti min-kıbeli’l-üm ceddesi Hadîce Hatun bt. Abdullah ile usûbet-i nesebiye cihetinden müteveffâ-yı mezbûrun li-ebeveyn er karındaşı olup kendüden mukaddem fevt olan Abdullah Efendi’nin zevcesi Saliha Hatun’un batnında müstebîn hamle münhasıra ve tashîh-i meselesi altı sehmden olup sihâm-ı mezbûrenin bir sehmi mezbûre Hadîce Hatun’a ve bâkī beş sehmi haml-i merkūma isâbeti tahakkukundan sonra zâtı ta‘rîf-i şer‘î ile mu‘arrefe olan mezbûre Hadîce Hatun meclis-i ma‘kūd-ı mezkûrda zâtı kezâlik ta‘rîf-i şer‘î ile mu‘arrefe olan bâ‘isetü’l-kitâb mezbûre Fâtıma Hatun mahzarında ikrâr ve takrîr-i kelâm edip mûrisim müteveffâ-yı mezbûrun terekesinden tashîh-i merkūm üzere bana isâbet eden hisse-i ırsiyemi müteveffâ-yı mezbûrun terekesine vâzı‘ü’l-yed olanlardan taleb ve da‘vâ ve ahz u kabz ve lede’l-iktizâ sulh ve ibrâya ve bunlar mütevakkıf olduğu umûrun küllîsine mezbûre Fâtıma Hatun’u tarafımdan vekîl ve nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i mezbûreyi kabûl ve hizmet-i lâzımesini edâya ta‘ahhüd ve iltizâm eylediğini mevlânâ-yı mezbûr mahâllinde tahrîr [ve] ma‘an mürsel el-Hâc Mehmed b. Mehmed ve Mustafa Çelebi b. el-Hâc Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî min-şehri Cemâziyelâhire li-sene selâse ve erba‘în ve mi’e ve elf. Şuhûdü’l-hâl: el-Hâc Osman b. Kemaleddin, Halil Efendi b. Ali, Hacı Mustafa b. Şeyh Abdullah Efendi, Molla Mustafa b. Mehmed, Hacı Halil b. Abdullah, Hasan Çelebi b. İbrahim