Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 178 Hüküm no: 120 Orijinal metin no: [26b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un, oğlundan miras kalan evin kendine ait hissesini Emine Hatun’a sattığı Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Dâye Hatun mahâllesinde sâkin iken bundan akdem vefât eden Fincânî Ahmed Çelebi b. el-Hâc Yusuf’un menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde, müteveffâ-yı mezbûrun verâseti zevce-i menkûha-i metrûkesi Emine Hatun bt. el-Hâc Süleyman ile vâlidesi Hadîce Hatun bt. Abdülkadir’e ve mezbûre Emine’nin batnında müstebîn hamle münhasıra olduğu şer‘an zâhir ve mütebeyyen oldukdan sonra müteveffâ-yı mezbûrun sülüs-i vasiyeti olmağla tashîh-i meselesi otuz altı sehmden olup sihâm-ı mezbûrenin on iki sehmi sülüs-i vasiyetine ve üç sehmi zevce-i mezbûre Emine Hatun’a ve dört sehmi vâlidesi mezbûre Hadîce Hatun’a ve bâkī on yedi sehmi haml-i merkūma isâbeti tahakkukundan sonra zâtı ta‘rîf-i şer‘î ile mu‘arrefe olan işbu bâ‘isetü’l-kitâb mezbûre Emine Hatun mahzarında ikrâr ve takrîr-i kelâm edip oğlum müteveffâ-yı mezbûrun ile’l-vefât yedinde mülk ve hakkı idiği müsbet olup mahrûse-i Galata muzâfâtından kasaba-i Tophane mahâllâtından Kâtib Mustafa mahâllesinde vâki‘ bir tarafdan Âişe Hatun mülkü ve ba‘zan el-Hâc Mahmud mülkü ve bir tarafdan benim âhar mülküm ve bir tarafdan Rukıye Hatun mülkü ve ba‘zan Mehmed Çelebi mülkü ve bir tarafdan Adalı diğer Mehmed Çelebi mülkü ile mahdûd fevkānî ve tahtânî iki bâb oda ve bir su kuyusu ve bir mikdâr bağçeyi müştemil mülk menzilden tashîh-i mezkûr üzere bana isâbet eden dört sehim hisse-i şâyi‘amı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mezbûre Emine Hatun’a on guruşa bey‘ ve temlîk ol dahi ber-vech-i muharrer iştirâ ve temellük ve kabûl eyledikden sonra semeni olan meblağ-ı mezbûr on guruşu mezbûre Emine Hatun yedinden tamâmen alıp kabz eyledim ba‘de’l-yevm menzil-i mezbûrda olan dört sehim hisse-i şâyi‘am mezbûre Emine Hatun’un mülk-i müşterâsı ve hakk-ı sırfı olmuşdur, keyfe mâ teşâ’ ve tehtâr mutasarrıfa olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Salih Beşe b. Halil ve Mehmed Çelebi b. Ali ile meclis-i şer‘a gelip [27a] alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 min-Cumâdelûlâ sene 1143. Şuhûdü’l-hâl: el-Hâc Mahmud b. Abdülkadir, Hâfız Mustafa Efendi b. Abdullah, Molla Osman b. Mustafa Efendi, İbrahim Ağa b. Ahmed, Mehmed Çelebi b. Mahmud