Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 181 Hüküm no: 123 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Çelebi’nin küçük kızına kalan harap ev hissesinin satılmasına izin verildiği Mahmiye-i İstanbul’da Küçük Ayasofya Câmi‘-i şerîfi kurbünde Hüseyin Ağa mahâllesinde sâkin iken bundan akdem vefât eden Mustafa Çelebi b. Ali’nin sulbî sagīr oğlu Mehmed’in vâlidesi ve bâ-hüccet-i şer‘iyye vasiyy-i muhtâresi Âişe Hatun bt. Abdullah meclis-i şer‘-i şerîf-i enverde takrîr-i kelâm edip câmi‘-i mezbûr vakfından olup mahâlle-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât vakıf menzil müteveffâ-yı mezbûrun ile’l-vefât taht-ı tasarrufundan olup ba‘de-vefâtihî intikāl-i âdî ile sulbiye kebîre kızı Fâtıma’ya ve vasîsi olduğum oğlu sagīr-i mezbûra intikāl edip lâkin menzil-i mezbûr harâba müşrif ve hâsılı harcına vefâ etmediğinden mâ‘adâ mezbûre Fâtıma hissesini bey‘e âzime olup sagīr-i mezbûrun hissesi kendüye nef‘ verir vech üzere ifrâz dahi mümkün olmamağla sagīr-i mezbûrun hissesi ba‘de’l-müzâyede ve inkıtâ‘i’r-rağbet bedel-i [misli] ve ma‘rifet-i mütevellî ile âhara ferâğ ve bedeli istirbâh ve istiğlâl olunmak sagīr-i mezbûr hakkında nef‘-i mahz olmağın sagīr-i mezbûrun hissesi ber-vech-i muharrer âhara ferâğa kıbel-i şer‘den bi’l-vesâye izin taleb ederim dedikde mezbûre Âişe Hatun’un kelimât-ı meşrûhası vâkı‘a mutâbıka idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir olmağın hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun hissesi ber-vech-i meşrûh ba‘de’l-müzâyede ve inkıtâ‘i’r-rağbet bedel-i misli ve bâ-ma‘rifet-i mütevellî âhara ferâğa mezbûre Âişe Hatun’a izin birle mâ-vaka‘a bi’t-taleb ketb olundu. Fî 11 min-Cumâdelâhire sene 1143. Şuhûdü’l-hâl: Mustafa Efendi b. Şeyh Abdüllatif Efendi el-imâm, İbrahim Çelebi b. Mahmud ser-müezzin, Abdullah Halîfe b. Mehmed el-müezzin, Abdurrahman Halîfe b. Mehmed, el-Hâc Ali b. Osman el-müezzin, el-Hâc Hasan b. Hüseyin