Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 190 Hüküm no: 132 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Süleyman’ın vefatıyla terekenin, tek varisi olan kardeşi İsmail’e kaldığı Husûs-ı âti’l-beyanın mahâllinde ber-nehc-i şer‘-i kavîm istimâ‘ ve terkīm için savb-ı şer‘-i enverden mezûnen Mevlânâ Mehmed Efendi irsâl olunup ol dahi mahmiye-i İstanbul’da Süleymaniye Câmi‘-i şerîfi kurbünde Ağakapısı dâhilinde Yeniçeri Beytülmal emîni olanlara mahsûs odaya varıp zeyl-i vesîkada muharrerü’l-esâmi Müslimîn huzûrlarında akd-i meclis-i şer‘-i şerîf ettikde elli bir cemâ‘atin odabaşısı iken bundan akdem vefât eden Ahmed b. Süleyman b. Abdullah’ın li-ebeveyn karındaşı ve hasran vârisi olduğunu iddi‘â eden işbu bâ‘isü’l-kitâb İsmail b. Süleyman b. Abdullah nâm kimesne meclis-i ma‘kūd-ı mezkûrda bi’l-fi‘il tâife-i mezkûre beytülmalı emîni olup tereke-i müteveffâ-yı mezbûra zâhirde vâris-i ma‘rûfu olmamak zu‘muyla bi’l-emâne vâzı‘ü’l-yed ve kıbel-i şer‘-i enverden husûmet ve redd-i cevâba mezûn olan fahrü’l-eşbâh Ahmed Ağa b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Ahmed benim li-ebeveyn karındaşım olup babamız ismi Süleyman ve dedemiz ismi Abdullah ve anamız ismi Fâtıma ve maskat-ı re’simiz vilâyet-i Rumeli’nde nefs-i Hezargrad olup müteveffâ-yı mezbûr Ahmed’in verâseti ancak bana münhasıra ve terekesine benden gayrı vâris ve müstahakk-ı âhar olmayıp hâlâ işbu emîn-i mûmâ-ileyh Ahmed Ağa’nın vaz‘-ı yed eylediği tereke-i müteveffâ-yı mezbûrdan ber-mantûk-ı defter-i kassâm ba‘de’l-ihrâcât yedinde bâkī kalan yedi bin yüz kırk akçe bi’l-verâse taleb ederim suâl olunsun dedikde gıbbe’s-suâl emîn-i mûmâ-ileyh cevâbında tereke-i müteveffâ-yı mezbûra vaz‘-ı yedini ikrâr lâkin müdde‘î-i mezbûr İsmail’in ber-vech-i muharrer verâsetini inkâr etmeğin müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden yirmi dokuz cemâ‘atin neferâtından Mehmed b. Abdullah ve elli bir cemâ‘atin neferâtından Mustafa Odabaşı b. Ramazan nâm kimesneler li-ecli’ş-şehâde meclis-i ma‘kūd-ı mezkûra hâzırân olup istişhâd olunduklarında fi’l-hakīka işbu müdde‘î-i mezbûr İsmail müteveffâ-yı mezbûr Ahmed ile li-ebeveyn karındaşlar olup anaları ismi Fâtıma ve babaları ismi Süleyman ve dedeleri ismi Abdullah ve maskat-ı re’sleri vilâyet-i Rumeli’nde nefs-i Hezargrad’dır, müteveffâ-yı mezbûrun verâseti ancak işbu müdde‘î-i mezbûr İsmail’e münhasıradır ve terekesine müdde‘î-i mezbûrdan gayrı vâris ve müstahakk-ı âharı olduğu ma‘lûmumuz değildir, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de-ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh müdde‘î-i mezbûr Ahmed meclis-i ma‘kūd-ı mezkûrda emîn-i mûmâ-ileyh muvâcehesinde i‘âde-i kelâm edip işbu emîn-i mûmâ-ileyh Ahmed Ağa ber-vech-i muharrer mûrisim müteveffâ-yı mezbûrun terekesinden makbûz olup ânifen bi’l-emâne edâ ve teslîme hükm-i şer‘î lâhık olan yedi bin yüz kırk akçeyi işbu meclis-i ma‘kūd-ı mezkûrda edâ ve teslîm ben dahi ahz u kabz edip mûrisim müteveffâ-yı mezbûrun terekesine müte‘allıka âmme-i de‘âvî ve mutâlebâtdan emîn-i mûmâ-ileyhin zimmetini ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 15 min-Cumâdelâhire sene 1143. Şuhûdü’l-hâl: Süleyman Efendi, Mehmed Halîfe, Hüseyin Halîfe, Molla Ali b. Abdullah, Halil b. Ali, Nâzır Hasan Ağa, Mustafa Ağa b. Receb, Mustafa Ağa b. Receb, Seyyid Mehmed Ağa b. Halil, Mehmed Çavuş b. Mehmed, Ali Ağa b. Cafer, Mehmed çavuşân-ı enderûn