Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 188 Hüküm no: 131 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Halil Çelebi’nin hayattayken Şahbaz ve Feyzi’yi azat etmiş olduğu Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Mustafa Efendi b. el-merhûm Yahya Efendi irsâl olunup ol dahi mahmiye-i İstanbul’da Kepenekçi Sinan mahâllesinde sâkin iken bundan akdem vefât eden Boyacı Halil Çelebi b. el-Hâc Mehmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûr rıkk-ı sâbıkını mu‘terife işbu uzun boylu, elâ gözlü, açık kaşlı, Rusiyyetü’l-asl, Müslimetü’l-millet, bâ‘isetü’l-kitâb Şahbaz bt. Abdullah meclis-i ma‘kūd-ı mezkûrda zâtları ta‘rîf-i şer‘î ile mu‘arrefe olup kendiye rık olup terekeden olmak üzere bi’l-verâse vâzı‘atü’l-yed olan müteveffâ-yı mezbûrun zevce-i menkûha-i metrûkesi Safiye Hatun bt. Abdullah ve sulbiye kebîre kızı Âişe Hatun mahzarlarında üzerlerine da‘vâ ve takrîr-i kelâm edip seyyidim müteveffâ-yı mezbûr Boyacı Halil Çelebi b. el-Hâc Mehmed b. Abdurrahman hayâtında fevtinden yirmi gün mukaddem câriye-i memlûkesi olduğum hâlde beni huzûr-ı Müslimînde hasbeten lillâhi te‘âlâ mâlından tahrîr ve i‘tâk ve silk-i harâir-i asliyât zümresine idrâc ve ilhâk edip ben hürre olmuş iken mezbûretân Safiye Hatun ve Âişe Hatun rık olup terekeden olmak üzere bana bi-gayrı hakkın vaz‘-ı yed ederler suâl olunup sebîlim tahliye olunmak matlûbumdur dedikde gıbbe’s-suâl mezbûretân cevâblarında mevsûfe-i mezbûreye rık olup terekeden olmak üzere vaz‘-ı yedlerini ikrâr lâkin ber-vech-i muharrer müdde‘âsını inkâr edicek müdde‘iye-i mezbûreden müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Timurtaş mahâllesinde sâkin el-Hâc Mustafa b. el-Hâc Mehmed ve Mehmed Çelebi b. Mehmed ve Osman Çelebi b. Abdurrahman li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr Boyacı Halil Çelebi b. el-Hâc Mehmed b. Abdurrahman hayâtında fevtinden yirmi gün mukaddem câriye-i memlûkesi işbu müdde‘iye-i mezbûre Şahbaz bt. Abdullah’ı huzûrumuzda hasbeten lillâli te‘âlâ mâlından tahrîr ve i‘tâk ve silk-i harâir-i asliyât zümresine idrâc ve ilhâk edip mevsûfe-i mezbûre sâir harâir-i asliyât gibi hürre olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ali Çelebi b. Mehmed ve Halil b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 19 min-Cumâdelâhire sene 1143. Şuhûdü’l-hâl: Abdülkadir Ağa b. İbrahim, Ahmed Çelebi b. Mehmed, Ali Ağa b. Mehmed, Mehmed Çelebi b. (°), Ali Çelebi b. el-Hâc Mustafa, Mustafa Çelebi b. Hasan Kezâlik uzun boylu, kara gözlü, açık kaşlı, Gürciyetü’l-asl, Müslimetü’l-millet, bâ‘isetü’l-kitâb Feyzi bt. Abdullah, şâhidûn-ı mezbûrûn şehâdetleriyle ıtkına ba‘de’l-hükm ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn