Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 195 Hüküm no: 137 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe’nin Rukıye ve Havva’nın vasisinden borç aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Süleymaniye Câmi‘-i şerîfi kurbünde Dökmeciler Sûku’nda el-Hâc Mehmed b. Ali’nin odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Abdi Subaşı mahâllesinde sâkin Hüseyin Beşe b. Abdullah meclis-i ma‘kūd-ı mezkûrda mahmiye-i mezbûrede Sultân Selim kurbünde Tevkī‘î Cafer mahâllesi ahâlîsinden olup vilâyet-i Rumeli’nde Praveşte kazâsında misâfiren sâkin iken bundan akdem vefât eden es-Seyyid el-Hâc Mehmed b. Osman’ın sulbiye sagīre kızları Şerîfe Rukıye ve Şerîfe Havva’nın vâlideleri ve tesviye-i emrlerine cânib-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe olan bâ‘isetü’l-kitâb Emine Hatun bt. Abdullah mahzarında ikrâr ve takrîr-i kelâm edip sagīretân-ı mezbûretân Şerîfe Rukıye ve Şerîfe Havva’nın mâllarından olmak üzere vasîleri mezbûre Emine Hatun yedinden nakid istidâne ve kabz eylediğim iki yüz kırk guruş ile semeni târîh-i kitâbdan üç yüz altmış bir gün tamâmına değin müeccel ve mev‘ûd vasiyye-i mezbûre yedinden iştirâ ve kabz eylediğim bir kıt‘a Mushaf-ı şerîf hediyesi dahi otuz altı guruş ki, cem‘an iki yüz yetmiş altı guruş zimmetimde sagīretân-ı mezbûretâna müeccel ve mev‘ûd vâcibü’l-edâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde [tahrîr] ba‘dehû ma‘an irsâl olunan el-Hâc İbrahim b. Hüseyin ve Mehmed Çelebi b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 2 min-Cumâdelâhire sene 1143. Şuhûdü’l-hâl: Çorbacı Mehmed Ağa b. Ahmed, el-Hâc Mehmed b. Ali, el-Hâc İbrahim b. Ömer, Salih Ağa b. Ahmed, es-Seyyid Hüseyin b. Mehmed, es-Seyyid Mustafa b. Osman, Mehmed Çelebi b. Ali, Ali Efendi b. Abdullah