Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 196 Hüküm no: 138 Orijinal metin no: [30b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’ya emaneten verilen eşyanın Mehmed’in varisleri tarafından alındığı Husûs-ı âti’l-beyanın mahâllinde ketb ü tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Abdi Subaşı mahâllesinde sâkin Hüseyin Beşe b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûre[de] Nişâncı-yı Atik kurbünde Tevkī‘î Cafer mahâllesi ahâlîsinden olup vilâyet-i Rumeli’nde Praveşte kazâsında misâfiren sâkin iken bundan akdem vefât eden es-Seyyid el-Hâc Mehmed b. Osman’ın verâseti zevce-i menkûha-i metrûkesi Emine Hatun bt. Abdullah ile sulbiye kebîre kızı Şerîfe Fâtıma’ya ve sulbiye sagīre kızları Şerîfe Rukıye ve Şerîfe Havva’ya ve sulbiye âhar kebîre kızı olup kazâ-i mezbûrda sâkine Şerîfe Saliha’ya ve vâlidesi Âişe Hatun bt. el-Hâc Mehmed’e ve li-ebeveyn er karındaşı es-Seyyid el-Hâc Mustafa’ya münhasıra ve tashîh-i meselesi yirmi dört sehmden olmağla sihâm-ı mezbûrenin üç sehmi zevcesi mezbûreye ve dört sehmi kızları mezbûrât Şerîfe Fâtıma ve Şerîfe Havva ve Şerîfe Rukıye ve Şerîfe Saliha’dan her birine ve dört sehmi vâlidesi mezbûre Âişe Hatun’a ve bir sehmi karındaşı mezbûr el-Hâc Mustafa’ya isâbeti tahakkukundan sonra sagīretân-ı mezbûretânın vâlideleri ve tesviye-i emrlerine cânib-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe olan mezbûre Emine Hatun asâleten ve vesâyeten ve zâtı ta‘rîf-i şer‘î ile mu‘arrefe olan mezbûre Âişe Hatun’a kezâlik asâleten ve mezbûre Şerîfe Saliha’nın tarafından ve husûs-ı âti’l-beyanda ahz u kabza vekîl-i sâbitü’l-vekâlesi olmağla vekâleten meclis-i ma‘kūd-ı mezkûrda müteveffâ-yı mezbûrun mûdi‘i bâ‘isü’l-kitâb mezbûr es-Seyyid el-Hâc Mustafa mahzarında her biri bi’l-asâle ve bi’l-vesâye ve bi’l-vekâle ikrâr ve takrîr-i kelâm edip müteveffâ-yı mezbûr es-Seyyid el-Hâc Mehmed hayâtında yedinde mülk [31a] ve hakkı olup işbu mahâlde mu‘âyene olunan altı aded elvan Hind şalları ile kırk sekiz dirhem Kumârî od ağacını mezbûr es-Seyyid el-Hâc Mustafa’ya bi-tarîkı’l-emâne vaz‘ ve teslîm edip ol dahi bi’l-emâne ahz u kabz etmekle el-hâletü hâzihi zikr olunan şallar ile od ağacını mezbûr es-Seyyid el-Hâc Mustafa bize def‘ u teslîm biz dahi asâlet ve vesâyet ve vekâletimiz hasebiyle yedinden ahz u kabz edip min-ba‘d müteveffâ-yı mezbûrun terekesinden mûdî‘-i mezkûr es-Seyyid el-Hâc Mustafa yedinde bir nesne bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan el-Hâc İbrahim b. Hüseyin ve Mehmed b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Cumâdelâhire sene 1143. Şuhûdü’l-hâl: el-Hâc İbrahim b. Ömer, el-Hâc Mehmed b. Ali, Salih Ağa b. Ahmed, Mehmed Ağa b. Ahmed, el-Hâc Mehmed b. Hasan, es-Seyyid Hasan b. el-Hâc Mehmed, Mustafa Ağa b. Mehmed