Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 198 Hüküm no: 140 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed b. Mustafa’nın sattığı evde varislerin hakkı olmadığı Mahmiye-i İstanbul’da Hadîce Sultân mahâllesinde sâkin iken bundan akdem vefât eden el-Hâc Mehmed b. Mustafa’nın verâseti zevce-i menkûha-i metrûkeleri Fâtıma Hatun bt. Abdullah ve Hadîce Hatun bt. Ahmed ile sulbiye kebîre kızları Hamide ve Havva’ya ve mezbûre Hadîce Hatun’un batnında müstebîn hamle münhasıra olduğu şer‘an zâhir oldukdan sonra haml-i merkūmun hisse-i merkūmesini hıfza kıbel-i şer‘den mansûb vasîsi olmağla terekesine bi’l-vesâye vaz‘-ı yed eden Abdülkadir Ağa b. Ali meclis-i şer‘-i şerîf-i enverde zâtı ta‘rîf-i şer‘î ile mu‘arrefe olan işbu bâ‘isü’l-kitâb mezbûre Fâtıma Hatun mahzarında üzerine da‘vâ ve takrîr-i kelâm edip mahâlle-i mezbûrede vâki‘ bir tarafdan el-Hâc Ali mülkü ve bir tara[fdan] iplikçi Aleksi nâm zimmî menzili ve bir [tarafdan] müteveffâ-yı mezbûrun mutasarrıf olduğu vakıf arsa ve bir tarafdan tarîk-i âm ile mahdûd ve büyût-ı adîdeyi müştemil mülk menzil müteveffâ-yı mezbûrun ile’l-vefât yedinde mülkü iken mezbûre Fâtıma Hatun menzil-i mahdûd-ı mezbûru müstakilleten hıfz edip vasîsi olduğum haml-i merkūmun hisse-i şer‘iyyesini bana teslîmden imtinâ‘ eder suâl olunsun dedikde gıbbe’s-suâl mezbûre Fâtıma Hatun cevâbında menzil-i mahdûd-ı mezkûr zevci müteveffâ-yı mezbûrun mukaddemâ mülkü olduğunu ikrâr lâkin zevcim müteveffâ-yı mezbûr el-Hâc Mehmed b. Mustafa b. Abdullah hâl-i kemâl-i sıhhatinde fevtinden on beş ay mukaddem menzil-i mahdûd-ı mezkûru huzûr-ı Müslimînde iki yüz elli guruşa bana bey‘ ve teslîm ben dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûr iki yüz elli guruşu yedinden tamâmen ahz u kabz etmekle menzil-i mahdûd-ı mezkûr benim mülk-i müşterâm olmuşdur [31b] deyü def‘le mukābele edicek gıbbe’l-istintâk ve’l-inkâr mezbûre Fâtıma Hatun’dan def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Halil Çelebi b. Ahmed ve mahmiye-i mezbûrede Kasım Ağa mahâllesinde sâkin Abdülkerim Çavuş Ağa b. Mustafa li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mehmed b. Mustafa b. Abdullah hâl-i kemâl-i sıhhatinde fevtinden on beş ay mukaddem yedinde mülkü olup zikr olunan Hadîce Sultân mahâllesinde vâki‘ bir tarafdan el-Hâc Ömer mülkü ve bir tarafdan İplikçi Aleksan nâm zimmî menzili ve bir tarafdan müteveffâ-yı mezbûrun taht-ı tasarrufunda olan vakıf arsa ve bir tarafdan tarîk-i âm ile mahdûd büyût-ı adîdeyi müştemil mülk menzilini ber-vech-i muharrer zevcesi merkūme Fâtıma Hatun’a iki yüz elli guruşa huzûrumuzda bey‘ ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezbûr iki yüz elli guruşu yedinden tamâmen ahz u kabz etmekle menzil-i mahdûd-ı mezkûr mezbûre Fâtıma Hatun’un mülk-i müşterâsı olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle vasiyy-i mezbûr Abdülkadir Ağa merkūme Fâtıma Hatun ile menzil-i mahdûd-ı mezkûra müte‘allıka bî-vech mu‘ârazadan men‘ birle mâ-vaka‘a bi’t-taleb ketb olundu. Fî 13 min-Cumâdelâhire sene 1143. Şuhûdü’l-hâl: el-Hâc İsmail Efendi b. Mehmed, es-Seyyid Ahmed Efendi b. Mehmed, es-Seyyid Mehmed b. Ali, Abdullah Efendi b. Halil, Ebubekir Efendi b. İbrahim, Abdullah Efendi b. Receb, Ali Efendi b. Ahmed