Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 197 Hüküm no: 139 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Ahmed’in vefat eden Dökmeci Mustafa’daki borcunun terekeden tahsili Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Kalenderhâne kurbünde Molla Hüsrev mahâllesinde sâkin Mehmed Ağa b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Küçükmustafapaşa kurbünde diğer Molla Hüsrev mahâllesi ahâlîsinden olup vilâyet-i Rumeli’nde Praveşte kazâsında misâfiren sâkin iken bundan akdem vefât eden Dökmeci el-Hâc Mustafa b. Ömer’in kız karındaşı oğlu bâ‘isü’l-kitâb A‘mâ Molla Ahmed b. Osman meclis-i ma‘kūd-ı mezkûrda müteveffâ-yı mezbûrun evlâd-ı sıgārı Ömer ve Âişe ve Hadîce’nin tesviye-i emrlerine cânib-i şer‘den mansûb vasîleri olmağla terekesine bi’l-vesâye vâzı‘ü’l-yed olan Çorbacı Mehmed Ağa b. Ahmed mahzarında üzerine da‘vâ ve takrîr-i kelâm edip işbu yedimde olan [deyn] temessükü mûcebince müteveffâ-yı mezbûr el-Hâc Mustafa b. Ömer b. Abdullah zimmetinde cihet-i karz-ı şer‘îden yüz seksen beş guruş hakkım olup hattâ müteveffâ-yı mezbûr hâl-i kemâl-i sıhhatinde fevtinden bir ay mukaddem meblağ-ı mezkûr cihet-i mezbûrdan zimmetinde bana vâcibü’l-edâ deyni olduğunu huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden zikr olunan Kalenderhâne kurbünde Molla Hüsrev mahâllesinde sâkin Molla Ali b. Ahmed ve Ömer Beşe b. Şa‘bân li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr el-Hâc Mustafa b. Ömer b. Abdullah hâl-i kemâl-i sıhhatinde fevtinden bir ay mukaddem işbu müdde‘î-i mezbûr A‘mâ Molla Ahmed’e yedinde olan deyn temessükü mûcebince cihet-i karz-ı şer‘îden yüz seksen beş guruş zimmetimde vâcibü’l-edâ deynimdir deyü huzûrumuzda ikrâr ve bizi işhâd eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1143. Şuhûdü’l-hâl: el-Hâc Mustafa b. Osman, Mustafa b. Musa, diğer Mustafa b. Hasan, es-Seyyid Hasan b. el-Hâc Mehmed, el-Hâc İbrahim b. Ömer, el-Hâc Mehmed b. Mahmud, el-Hâc Ahmed b. Osman, Salih Ağa b. Ahmed