Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 202 Hüküm no: 142 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed’in terekesinden olan bağın Zeynep Hanım’a satıldığı Husûs-ı âti’z-zikrin mahâllinde ketb ü tahrîri için savb-ı şer‘-i şerîf-i enverden irsâl olunan Mevlânâ Şeyhzâde Hüseyin Efendi mahmiye-i İstanbul’da Güngörmez mahâllesinde sâkin el-Hâc Mustafa b. Receb’in menziline varıp zeyl-i kitâbda muharrerü’l-esâmi Müslimîn huzûrunda akd-i meclis-i şer‘-i şerîf ettikde mahâlle-i mezbûrede sâkin iken bundan akdem vefât eden el-Hâc Ahmed b. Abdullah’ın verâseti zevce-i menkûha-i metrûkesi Fâtıma Hatun bt. İbrahim ile usûbet-i nesebiye cihetinden mezbûr el-Hâc Mustafa’ya münhasıra ve tashîh-i meselesi dört sehmden olmağla sihâm-ı mezbûrenin bir sehmi zevcesi mezbûre Fâtıma Hatun’a ve bâkī üç sehmi mezbûr el-Hâc Mustafa’ya isâbeti tahakkukundan sonra mezbûr el-Hâc Mustafa ve zâtı ta‘rîf-i şer‘î ile mu‘arrefe olan bâ‘isetü’l-kitâb Zeyneb Hanım bt. el-merhûm İbrahim Efendi mahzarında her biri bi’l-verâse ikrâr ve takrîr-i kelâm edip mûrisimiz müteveffâ-yı mezbûrun ile’l-vefât yedinde mülk ve hakkı idiği müsbet olup vilâyet-i Anadolu’da Yoros kazâsına tâbi‘ Kanlıcak karyesinde vâki‘ bir tarafdan merhûm Rasul Efendi veresesi bağı ve bir tarafdan Ahmed Efendi bağı ve bir tarafdan İsmail Çelebi bağı ve bir tarafdan tarîk-i hâs ile mahdûd kürûmu mülk ve içinde eşcâr-ı müsmire ve gayr-ı müsmireyi müştemil bağı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûre Zeyneb Hanım’a yirmi dört guruşa bey‘ ve temlîk edip ol dahi ber-vech-i muharrer iştirâ ve temellük eyledikden sonra semeni olan meblağ-ı mezbûru tashîh-i mezkûr üzere bi-kadri’l-hısas her birimiz tamâmen alıp kabz eyledik. Bağ-ı mahdûd-ı mezbûru mahâllinde kabza mezbûre Zeyneb Hanım’ı taslît eyledik ba‘de’l-yevm bağ-ı mezkûr, mezbûre Zeyneb Hanım’ın mülk-i müşterâsı ve hakk-ı sırfı olmuşdur, keyfe mâ teşâ’ ve tehtâr mutasarrıfa olsun dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ba‘dehû ma‘an mürsel Ahmed Çelebi b. İsmail ve Mehmed Beşe b. Ali ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-âşir min-Cumâdelâhire sene 1143. Şuhûdü’l-hâl: Hasan Çelebi b. Ahmed, Ahmed Beşe b. Halil, el-Hâc Selim b. Abdullah, Mustafa Odabaşı b. Hasan, Mehmed Çelebi b. Abdullah