Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 202 Hüküm no: 143 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dökmeci Mustafa’nın varisleri Ümmü Gülsüm ve Meryem’in terekedeki haklarını almak için Mehmed Ağa’yı vekil tayin ettikleri Husûs-ı âti’l-beyanın mahâllinde ketb ü tahrîri için savb-ı şer‘-i şerîf-i enverden mezûnen irsâl olunan Mevlânâ Mehmed Efendi b. İbrahim mahmiye-i İstanbul’da Kalenderhâne kurbünde Molla Hüsrev mahâllesinde sâkin Mehmed Ağa b. Ahmed’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde fi’l-asl mahmiye-i mezbûrede Küçükmustafapaşa kurbünde diğer Molla Hüsrev mahâllesi sükkânından olup vilâyet-i Rumeli’nde Praveşte kazâsında misâfiren sâkin iken bundan akdem vefât eden Dökmeci el-Hâc Mustafa b. Ömer’in verâseti kazâ-i mezbûrda sâkine zevce-i menkûha-i metrûkesi Ümmü Gülsüm bt. Abdullah ile vâlidesi Meryem bt. Hüseyin’e ve evlâd-ı sıgārı Ömer ve Âişe ve Hadîce’ye münhasıra ve tashîh-i meselesi doksan altı sehmden olmağla sihâm-ı mezbûrenin on iki sehmi zevcesi mezbûreye ve on altı sehmi vâlidesi mezbûreye ve bâkī altmış sekiz sehmin otuz dört sehmi sagīr-i mezbûr Ömer’e ve on yedi sehmi sagīretân-ı mezbûretân Âişe ve Hadîce’den her birine isâbeti tahakkukundan sonra mezbûretân Ümmü Gülsüm ve Meryem taraflarından vekâlet iddi‘â eden bâ‘isü’l-kitâb mezbûr Mehmed Ağa meclis-i ma‘kūd-ı mezkûrda müteveffâ-yı mezbûrun mûdi‘i el-Hâc Mehmed b. Ali mahzarında üzerine da‘vâ ve takrîr-i kelâm edip mezbûre Ümmü Gülsüm bt. Abdullah b. Abdullah ve Meryem bt. Hüseyin b. Abdullah mûrisleri müteveffâ-yı mezbûrun terekesinden kendülere isâbet eden hisse-i ırsiye-i ma‘lûmelerini mûdî‘-i mezkûr el-Hâc Mehmed’den ve sâir terekesine vâzı‘ü’l-yed olanlardan taleb ü da‘vâ ve ahz u kabz ve sulh ü ibrâya ve kabz ü îsâle mütevakkıf olan umûrun küllîsine taraflarından huzûr-ı Müslimînde beni vekîl ve nâib-i menâb nasb u ta‘yîn ettiklerinde ben dahi vekâlet-i mezbûreyi kabûl etmekle müteveffâ-yı mezbûr hayâtında ber-mûceb-i defter-i müfredât mezbûr el-Hâc Mehmed’e bi-tarîkı’l-emâne def‘ ve teslîm eylediği kırk üç bin iki yüz akçe kıymetli dökmeci metâ‘ından tashîh-i mezkûr üzere hisselerine isâbet eden on iki bin altı yüz akçeyi mezbûr el-Hâc Mehmed’den taleb ederim suâl olunsun dedikde gıbbe’s-suâl mezbûr el-Hâc Mehmed cevâbında zikr olunan dökmeci metâ‘ına ber-vech-i muharrer vaz‘-ı yedini ikrâr lâkin müdde‘î-i mezbûrun müdde‘âsını inkâr edicek müdde‘î-i mezkûrdan müdde‘âsına beyyine taleb olundukda udûl-i ahrâr-ı ricâl-i Müslimînden kazâ-i mezbûr sükkânından olup zikr olunan Kalenderhâne mahâllesinde sâkin Halil Ağa b. Ahmed Çelebi b. Mehmed li-ecli’ş-şehâde meclis-i ma‘kūd-ı mezbûra hâzırân olup istişhâd olunduklarında fi’l-hakīka şahsı rü’yetimiz ile ma‘lûmumuz olan mezbûre Ümmü Gülsüm bt. Abdullah b. Abdullah ve Meryem bt. Hüseyin b. Abdullah mûrisleri Dökmeci el-Hâc Mustafa’nın terekesinden tashîh-i mezkûr üzere kendülere isâbet eden hisse-i ırsiye-i ma‘lûmelerini mûdî‘-i mezbûr el-Hâc Mehmed’den ve sâir terekesine vâzı‘ü’l-yed olanlardan taleb ü da‘vâ ve ahz u kabz ve sulh ü ibrâya ve kabz u îsâle mütevakkıf olan umûrun küllîsine taraflarından müdde‘î-i mezbûr Mehmed Ağa’yı huzûrumuzda vekîl ve nâib-i menâb nasb u ta‘yîn ettiklerinde ol dahi vekâlet-i mezbûreyi kabûl eyledi [32b] biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahâllinde tahrîr ve ba‘dehû ma‘an irsâl olunan el-Hâc İbrahim b. Hüseyin ve Mehmed Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 5 min-Cumâdelâhire sene 1143. Şuhûdü’l-hâl: el-Hâc İbrahim b. Ömer, el-Hâc Mehmed b. Mahmud, el-Hâc Ahmed b. Osman, Salih Ağa b. Ahmed, Hasan Çelebi b. el-Hâc Mehmed, Mustafa Çelebi b. Halil