Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 223 Hüküm no: 165 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden İsmail Ağa’nın Cami Müezzinlerinin Nukud Vakfı’na olan borcunun terekeden ödenmesi Kezâlik akd-i meclis-i şer‘-i şerîf ettikde zikr olunan Câmi‘-i şerîf müezzinlerinin nukūd-ı mevkūfelerine bi’l-fi‘il mütevellî olan bâ‘isü’l-kitâb Müezzinbaşı İbrahim Halîfe b. Mehmed meclis-i ma‘kūd-ı mezkûrda müteveffâ-yı mezbûrun vesâyâsını tenfîze bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan İsmail Ağa b. Mehmed ile müteveffâ-yı mezbûrun zevce-i menkûha-i metrûkesi Hadîce Hatun bt. Abdullah’ın vekîl-i müsecceli diğer İsmail Ağa b. Abdi mahzarlarında üzerlerine bi’t-tevliye da‘vâ ve takrîr-i kelâm edip müteveffâ-yı mezbûr Süleyman Çelebi b. Mehmed b. Ali vakf-ı mezbûra bundan mukaddem mütevellî olmağla vakf-ı mezbûrun nukūdu olan beş yüz on dört guruş yedinde olup hattâ müteveffâ-yı mezbûr hâl-i hayâtında vakf-ı mezbûrun ol kadar guruşu yedinde olup ve masârıfına sarfla istihlâk eylediği huzûr-ı Müslimînde ikrâr ve işhâd edip kable’l-edâ meyyiten fevt olmağla terekesinden bi’t-tevliye taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Mustafa Efendi b. eş-Şeyh Abdüllatif ve es-Seyyid Arif Efendi b. Mehmed ve Abdullah Ağa b. Mehmed li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-vâki‘ müteveffâ-yı mezbûr Süleyman Çelebi b. Mehmed b. Ali hayâtında mütevellîsi olduğu vakf-ı mezbûrun beş yüz on dört guruşu yedinde olup ve masârıfına sarfla istihlâk eylediğini huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘î-i mezbûrun husûs-ı mezbûrda sun‘u olmamağla yemîn dahi tevcîh etmeyip mûcebiyle ba‘de’l-hükm müdde‘î-i mezbûr İbrahim Halîfe meclis-i mezbûrda mezbûrân İsmail Ağa ve diğer İsmail Ağa mahzarlarında bi’t-tevliye ikrâr ve takrîr-i kelâm edip ânifen edâsına hükm olunan meblağ-ı mezbûr beş yüz on dört guruşu müteveffâ-yı mezbûrun terekesinden olmak üzere bana def‘ u teslîm ben dahi yedlerinden alıp kabz eyledim min-ba‘d meblağ-ı mezbûr beş yüz on dört guruşdan mezbûrân yedlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli ilâ âhırihî. Fî 20 min-Cumâdelûlâ sene 1143. Şuhûdü’s-sâbıkūn