Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 223 Hüküm no: 164 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin vefat etmeden önce vasiyetini yerine getirmek üzere İsmail Ağa’yı vasi tayin ettiği Kezâlik akd-i meclis-i şer‘-i şerîf ettikde müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb İsmail Ağa b. Mehmed meclis-i ma‘kūd-ı mezkûrda müteveffâ-yı mezbûrun zevce-i menkûha-i metrûkesi olmağla terekesine bi’l-verâse vâzı‘ü’l-yed olup zâtı ta‘rîf-i şer‘î ile mu‘arrefe olan Hadîce Hatun bt. Abdullah mahzarında üzerine da‘vâ ve takrîr-i kelâm edip müteveffâ-yı mezbûr Süleyman Çelebi b. Mehmed b. Ali hâl-i hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere techîz ve tekfînim görülüp düyûn-ı müsbetem kazâ olundukdan sonra bâkī kalan terekemden zevcem mezbûre Hadîce Hatun rub‘ hissesini ba‘de’l-kabz selâse-i erbâ‘ını mahrûse-i Edirne’de li-ebeveyn karındaşım Ahmed’e îsâl eyleye deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ vefât etmekle tenfîz-i vesâyâ murâd eylediğimde mezbûre Hadîce Hatun mâni‘a olur suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûrede sâkin Mustafa Efendi b. eş-Şeyh Abdüllatif Efendi ve Abdurrahman Ağa b. Mehmed li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Süleyman Çelebi b. Mehmed b. Ali hâl-i hayâtında bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekemden zevcem mezbûre Hadîce Hatun rub‘ hissesini ba‘de’l-kabz selâse-i erbâ‘ını mahrûse-i Edirne’de li-ebeveyn karındaşım Ahmed’e îsâl eyle deyü vasiyet edip tenfîzine huzûrumuzda işbu müdde‘î-i mezbûru vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ mezbûr Süleyman Çelebi vefât eyledi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eyledikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ ilâ-âhırihî. Fî 13 min-Cumâdelûlâ sene 1143. Şuhûdü’s-sâbıkūn