Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 229 Hüküm no: 168 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un terekesi Mahmiye-i İstanbul’da Molla Fenârî mahâllesinde sâkine iken bundan akdem vefât eden merhûme Emine Hatun’un verâseti zevc-i metrûkü fahrü’l-akrân Süleyman Ağa b. Abdurrahman ile vâlidi hâlâ Yeniçeri Efendisi umdetü erbâbi’t-tahrîr ve’l-kalem zübdetü eshâbi’t-takrîr zü’l-kadri’r-refî‘ ve’l-câhü’l-menî‘ izzetlü Mehmed Emin Efendi’ye ve vâlidesi fahrü’l-muhadderât Afife Hatun bt. Abdülmennan’a ve sadriye sagīre kızı Fâtıma’ya münhasıra olup ba‘dehâ sagīre-i mezbûre Fâtıma dahi vefât edip verâseti babası mezbûr Süleyman Ağa ile min-kıbeli’l-üm ceddesi mûmâ-ileyhâ Afife Hatun’a münhasıra ve tashîh-i meselesi bi-hükmi’l-münâsaha ve’l-kavl on üç sehmden olmağla sihâm-ı mezbûrenin sekiz sehmi mezbûr Süleyman Ağa’ya ve iki sehmi mûmâ-ileyh Mehmed Emin Efendi’ye ve üç sehmi mûmâ-ileyhâ Afife Hatun’a isâbeti tahakkukundan sonra mûmâ-ileyh Mehmed Efendi ile mûmâ-ileyhâ Afife Hatun taraflarından müseccel vekîli kıdvetü erbâbi’t-tahrîr ve’l-kalem Ali Efendi ve mezbûr Süleyman Ağa taleb ve ma‘rifetleriyle tahrîr ve taksîm olunan tereke-i müteveffât-ı mezbûre Emine Hatundur ki ber-vech-i âtî zikr olunur. Fî 18 min-Cumâdelâhire sene 1143. Atlas işleme yasdık 5 çift 18.000 akçe Kara döşek yüzü 2 1.000 akçe Mardin perdesi 4.000 akçe İşleme kapı ve ocak perdesi 2 6.000 akçe Atlas boğça 1.000 akçe Şam yasdığı 1.800 akçe Sofra peşkir 500 akçe Surmâye mak‘ad 2 1.000 akçe Frenk şilte yasdık 1 çift 1.000 akçe Banaluka seccâde 2.400 akçe Mardin dâr perde 2 3.000 akçe Mardin mak‘adı 3 1.000 akçe Mardin şiltesi 1.200 akçe İşleme yorgan bâ-çarşeb 2.000 akçe Def‘a işleme yorgan 1.800 akçe Yemenî yorgan 3 3.000 akçe Köhne yemenî yorgan 2 820 akçe Def‘a yemenî yorgan 4 1.200 akçe Şilte 6 1.500 akçe İnci serpûş dalı 5 8.000 akçe İnci saçlık 3 3.600 akçe İnci yakalık 4.000 akçe İnci sâfî 4.800 akçe Altın bilezik 2 çift, 41,5 miskāl 21.000 akçe Elmas ön kuşak 48.000 akçe Elmas yüzük 9.600 akçe Lâciverd hatem 700 akçe Altın kuşak 16.600 akçe Zümrüd küpe 1 çift 10.000 akçe İnci küpe 1 çift 1.200 akçe Yüzük 600 akçe Sîm zarf 4 1.200 akçe Fağfur fincân 7 300 akçe Elvan boyama 11 3.300 akçe Mushaf-ı şerîf kîsesi 600 akçe Tel çekme 2 1.000 akçe Yemenî 3 1.500 akçe Şukûfî 1.000 akçe Mantar sofra 300 akçe Fağfûrî sagīr tabak 8 300 akçe Bürüncük işleme yorgan yüzü 2 3.600 akçe Hâre cübbe 500 akçe Def‘a hâre cübbe 500 akçe Hâre koşdurma 2 2.000 akçe Dîbâ koşdurma 1.800 akçe Hatâî kavuşdurma 3 4.500 akçe Alaca anteri ve kavuşdurma 2.000 akçe Keremsûd işleme kavuşdurma 1 ve anteri 1 4.000 akçe Mor hatâî anteri 1.500 akçe Mor yasdık işleme 3 3.600 akçe Mor yasdık 300 akçe İş makraması 3 360 akçe Uçkur 4 480 akçe İşleme nihâli 3.000 akçe Gömlek 3 1.000 akçe Beyaz sincab kürk 1.200 akçe Sincab kürk 1.500 akçe Sîm sünbüle? 2.000 akçe Sîm maşraba 2.000 akçe Sîm buhurdan gülâbdân 4.400 akçe Sîm tepsi 2.400 akçe Sîm tas 4.400 akçe Sîm şamdân 3.000 akçe Sîm kahve ibriği 1.000 akçe Yaldızlı leğen ibrik 1.500 akçe Bosna tas 2 500 akçe Sagīr mücevher ön kuşak 6.000 akçe Sagīr inci kuşak 1.000 akçe Cedîd gömlek 6 1.800 akçe Don 6 600 akçe Bez parçası 2 600 akçe Def‘a bez parçası 150 akçe Ön şâhî ve yemenî kaftan 2 500 akçe Beyaz dîbâ anteri 1.000 akçe Yeşil hatâî anteri 400 akçe Kırmızı hâre koşdurma ve anteri 1.200 akçe Sarı hâre koşdurma ve anteri 1.200 akçe Kırmızı çuka ferâce 1.200 akçe Sof ferâce 1.000 akçe Yaşmak ve makrama 200 akçe Dokuma peşkir 2 400 akçe Don ve gömlek 300 akçe Beyaz anteri 120 akçe Beyaz terlik 150 akçe Beyaz çiçekli yemenî kaftan 300 akçe Telli üstlük 600 akçe Serpûş 2 180 akçe Ma‘den şamdân 2 240 akçe Sırmalı ayna 600 akçe Duvar aynası 240 akçe Sepet sandık 2 240 akçe Neftî çuka köhne nâfe kontuş kürk 600 akçe Hatâî kākum nîmten kürk 2.200 akçe ...? çuka kontuş biniş kürk 2.000 akçe Çatma yasdık gılâfıyla 9 9.000 akçe Minder 6 2.400 akçe Köhne yemenî mak‘ad 6 720 akçe Sagīr çuka dîmî yasdık 4 240 akçe [38a] Orta keçesi 2 3.000 akçe Beledî döşek 3 1.250 akçe Evân-ı bakır 40 kıyye, fî 100 4.000 akçe Mor yasdık 4 720 akçe Sükûfî 100 akçe Câriye be-nâm 24.000 akçe Mukaddemâ bey‘ olunan câriye semeninden bâkī nakid 9.600 akçe Mehr-i müeccel der-zimmet-i zevci’l-mezbûr 30.000 akçe Cem‘an yekûn semen-i eşyâ ve câriye ve mehir: 354.210 akçe Minhe’l-ihrâcât Mukaddemâ verilen resm-i âdî 3.600 akçe Resm-i âdî ve kassâmiye ve hüddâmiye 5.000 akçe Mukaddemâ verilen muhammine ve sâir masârıf 2.400 akçe Kaydiye-i defter 240 akçe Yekûn: 11.240 akçe Sahhü’l-bâkī Hissetü’z-zevci’l-mezbûr 211.056 akçe Hissetü’l-mûmâ-ileyh Mehmed Efendi 52.764 akçe Hissetü’l-mûmâ-ileyhâ Afife Hatun 79.146 akçe Kesr-i bâkī 4 akçe Zikri âtî eşyâ bâlâda mezkûre müteveffât-ı sagīre-i mezbûre Fâtıma’nın müstakilleten mülkü olmağla müteveffât-ı mezbûrenin verâseti babası mezbûr Süleyman Ağa ile min-kıbeli’l-üm ceddesi mûmâ-ileyhâ Afife Hatun’a münhasıra olmağın mezbûr Süleyman Ağa ve vekîl-i mûmâ-ileyh Ali Efendi iltimâsıyla tahrîr ve takdîm ve taksîm olunan terekesidir ki zikr olunur. Fi’t-târîhi’l-mezbûr li-seneti’l-merkūme. Şali ferâce 600 akçe Su samuru kürk 600 akçe Dîbâ kākum kürk 2.000 akçe Şali koşdurma 1.200 akçe Keremsûd koşdurma 1.000 akçe Köhne şâlî koşdurma 300 akçe Cübbe çuka 400 akçe Hatâî koşdurma 360 akçe Dîbâ anteri 1.200 akçe Sagīr inci küpe 1 2.040 akçe Altın bilezik 1 çift 4.250 akçe Nukūd-ı mevcûd 13.636 akçe Cem‘an yekûn: 27.586 akçe Minhe’l-ihrâcât, techîz ve tekfîn: 7.200 akçe Sahhü’l-bâkī: 20.386 akçe Hissetü’l-ebi’l-mezbûr Süleyman Ağa 16.989 akçe Hissetü’l-ceddeti’l-mezbûre Afife Hatun 3.397 akçe