Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 232 Hüküm no: 169 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa’nın vefat eden hanımı Emine ve kızı Fatıma’dan kalan mirastan kendi hakkını aldığı Husûs-ı âti’z-zikrin mahâllinde ketb ü tahrîri için bi’l-iltimâs savb-ı şer‘-i enverden Mevlânâ Abdülbaki Efendi b. Ahmed Efendi irsâl olunup ol dahi mahmiye-i İstanbul’da Molla Fenârî mahâllesinde hâlâ Yeniçeri Efendisi umdetü erbâb-ı tahrîr zübdetü eshâbi’t-takrîr zü’l-kadri’r-refî‘ ve’l-câhü’l-menî‘ izzetlü Mehmed Emin Efendi b. el-merhûm Veliyüddin Efendi’nin hânelerine varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mûmâ-ileyh Mehmed Emin Efendi’nin kerîmeleri olup bundan akdem vefât eden merhûme Emine Hatun’un verâseti zevc-i metrûkü fahrü’l-akrân Süleyman Ağa b. Abdurrahman ile vâlidi mûmâ-ileyh Mehmed Emin Efendi’ye ve vâlidesi fahrü’l-muhadderât Afife Hatun bt. Abdülmennan’a ve sadriye sagīre kızı Fâtıma’ya münhasıra olup ba‘dehâ sagīre-i mezbûre Fâtıma dahi vefât edip verâseti babası mezbûr Süleyman Ağa ile min-kıbeli’l-üm ceddesi mûmâ-ileyhâ Afife Hatun’a münhasıra ve tashîh-i meselesi bi-hükmi’l-münâsaha ve’l-kavl on üç sehmden olmağla sihâm-ı mezbûrenin sekiz sehmi mezbûr Süleyman Ağa’ya ve iki sehmi mûmâ-ileyh Mehmed Emin Efendi’ye ve üç sehmi mûmâ-ileyhâ Afife Hatun’a isâbeti tahakkukundan sonra mezbûr Süleyman Ağa meclis-i ma‘kūd-ı mezbûrda tereke-i merkūme-i mezbûre Emine Hatun’a bi’l-verâse vâzı‘ü’l-yed olan bâ‘iseyü’l-kitâb mûmâ-ileyh Mehmed Emin efendi ve mûmâ-ileyhâ Afife Hatun taraflarından müseccel vekîlleri kıdvetü erbâbi’t-tahrîr ve’l-kalem Ali Efendi mahzarında ikrâr ve takrîr-i kelâm edip müteveffât-ı evvel mezbûre Emine Hatun’un terekesi tahrîr ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere sekiz sehim hisseme isâbet eden iki yüz on bir bin elli altı akçe ve kızım sagīre müteveffât-ı mezbûre Fâtıma’nın müstakilleten mülkü olan terekesinden ba‘de-ihrâci’l-masârıf ber-mûceb-i defter-i mezbûr beş sehim hisseme isâbet eden on altı bin dokuz yüz dokuz akçe ki cem‘an iki yüz yirmi sekiz bin kırk beş akçe bi-hesâb-ı guruş bin dokuz yüz guruş on beş paranın iki yüz elli guruşunu zimmetimde olan mehr-i müeccele takās ben dahi mukāssa ve kabûl bâkī bin altı yüz elli guruş on beş parayı vekîl-i mûmâ-ileyh Ali Efendi terekeden olmak üzere işbu meclis-i mezbûrda bana tamâmen def‘ u teslîm ben dahi yedinden bi’t-tamâm ve’l-kemâl alıp kabz eyledim, meblağ-ı mezbûrdan vekîl-i mûmâ-ileyh Ali Efendi yedinde ve zimmetinde bir akçe ve bir habbe hakkım kalmayıp ba‘de’l-yevm müteveffât-ı mezbûre Emine Hatun’un ve ba‘dehû fevt olan kızım sagīre-i mezbûre Hadîce’nin dâhil-i defter ve hâric ez-defter [kalîl] ü kesîr ve celîl ü hakīr eşyâ ve câriye ve nakid bi’l-cümle ismi mâl ıtlâk olunur tereke-i ma‘lûme ve mechûlelerine müte‘allıka âmme-i de‘âvî ve mutâlebât ve kâffe-i eymân ve muhâsamâtdan müvekkil-i mûmâ-ileyh Mehmed Emin Efendi ve müvekkil-i mûmâ-ileyhâ Afife Hatun’un ve vekîl-i mezbûr Ali Efendi’nin zimmetlerini ibrâ-i âmm-ı kātı‘ü’n-nizâ‘la ibrâ ve ıskāt eyledim min-ba‘d husûs-ı mezkûra müte‘allıka müvekkil-i mûmâ-ileyh ve müvekkile-i [38b] mûmâ-ileyhâ ile vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Ahmed Çelebi b. İsmail ve Mehmed b. Yusuf ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Cumâdelâhire sene 1143. Şuhûdü’l-hâl: Fahrü’l-akrân Ali Ağa b. Abdullah, es-Seyyid Mustafa Efendi b. Ahmed, el-Hâc Mustafa b. Ahmed, el-Hâc Mustafa b. Musa el-imâm, Hüseyin Odabaşı b. Mahmud