Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 234 Hüküm no: 171 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Dökmeci Mustafa’nın dükkânındaki mal ve eşyaların Mehmed’e satıldığı Kezâlik akd-i meclis-i şer‘-i şerîf ettikde mahmiye-i mezbûrede Küçükmustafapaşa kurbünde Molla Hüsrev mahâllesi sükkânından olup vilâyet-i Rumeli’nde Praveşte kazâsında misâfiren sâkin iken bundan akdem vefât eden Dökmeci el-Hâc Mustafa b. Ömer’in verâseti kazâ-i mezbûrda sâkine zevce-i menkûha-i metrûkesi Ümmü Gülsüm bt. Abdullah, vâlidesi Meryem bt. Abdullah ile evlâd-ı sıgārı Ömer ve Âişe ve Hadîce’ye münhasıra ve tashîh-i meselesi doksan altı sehmden olmağla sihâm-ı mezbûrenin on iki sehmi zevcesi mezbûre Ümmü Gülsüm’e ve on altı sehmi vâlidesi mezbûre Meryem’e ve bâkī altmış sekiz sehmin otuz dört sehmi sagīr-i mezbûr Ömer’e ve on yedişer sehmi sagīretân-ı mezbûretân Hadîce ve Âişe’den her birine isâbeti tahakkukundan sonra sıgār-ı mezbûrûnun tesviye-i emrlerine cânib-i şer‘den mansûb vasîleri ve mezbûretân Ümmü Gülsüm ve Meryem taraflarından husûs-ı âti’l-beyanda ahz u kabz ve sulh ü ibrâya bâ-hüccet vekîlleri Mehmed Ağa b. Ahmed meclis-i ma‘kūd-ı mezbûrda bâ‘isü’l-kitâb mezbûr el-Hâc Mehmed mahzarında bi’l-vesâye ve bi’l-vekâle ikrâr-ı tâm ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı idiği müsbet olup işbu mahâllinde mu‘âyene olunan ma‘lûmü’l-aded mecmû‘u iki yüz altmış beş kıyye pirinç ve tuç ve mikrâs ve bi’l-cümle dökmeci metâ‘ını ba‘de’l-müzâyede ve inkıtâ‘i’r-rağbet semen-i misli ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile vesâyet ve vekâletim hasebiyle kırk üç bin iki yüz akçeye mezbûr el-Hâc Mehmed’e bey‘ ve temlîk ve teslîm edip ol dahi iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm kırk üç bin iki yüz akçeyi mezbûr el-Hâc Mehmed yedinden bi’l-vesâye ve bi’l-vekâle tamâmen alıp kabz edip min-ba‘d meblağ-ı mezbûrdan mezbûr el-Hâc Mehmed yedinde bir akçe ve bir habbe bâkī kalmayıp ba‘de’l-yevm zikr olunan dökmeci metâ‘ı merkūm el-Hâc Mehmed’in mülk-i müşterâsı ve hakk-ı sırfı olmuşdur keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’s-sâbıkūn