Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 234 Hüküm no: 170 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin vefat eden Dökmeci Mustafa’nın çocuklarına ait maldan borç para aldığı Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden irsâl olunan Mevlânâ Mehmed Efendi b. İbrahim mahmiye-i İstanbul’da Süleymaniye Câmi‘-i şerîfi kurbünde Dökmeciler sûkunda el-Hâc Mehmed b. Ali’nin odasına varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde mezkûr el-Hâc Mehmed meclis-i ma‘kūd-ı mezbûrda mahmiye-i mezbûrede Küçükmustafapaşa kurbünde Molla Hüsrev mahâllesi ahâlîsinden olup vilâyet-i Rumeli’nde Praveşte kazâsında misâfiren sâkin iken bundan akdem vefât eden Dökmeci el-Hâc Mustafa b. Ömer’in evlâd-ı sıgārı Ömer ve Hadîce ve Âişe’nin tesviye-i emrlerine cânib-i şer‘den mansûb vasîleri bâ‘isü’l-kitâb Mehmed Ağa b. Ahmed mahzarında ikrâr ve takrîr-i kelâm edip sıgār-ı mezbûrûn Ömer ve Hadîce ve Âişe’nin mâllarından olmak üzere vasîleri mezbûr Mehmed Ağa yedinden istidâne ve kabz eylediğim dört yüz altmış guruş ile semeni târîh-i kitâbdan üç yüz altmış bir gün tamâmına değin müeccel ve mev‘ûd vasiyy-i mezbûr Mehmed Ağa yedinden iştirâ ve kabz eylediğim bir kıt‘a Mushaf-ı şerîf hediyesi dahi kırk altı guruş ki cem‘an beş yüz altı guruş zimmetimde sıgār-ı mezbûrûn Ömer ve Hadîce ve Âişe’ye müeccel ve mev‘ûd vâcibü’l-edâ deynimdir dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hüseyin ve Mehmed Çelebi b. Abdullah ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelâhire sene 1143. Şuhûdü’l-hâl: el-Hâc İbrahim b. Ömer, el-Hâc Mehmed b. Mahmud, el-Hâc Ahmed b. Osman, es-Seyyid Mustafa b. Osman, Salih Ağa b. Ahmed, es-Seyyid Hasan Çelebi b. el-Hâc Mehmed berber, Mustafa Çelebi b. Halil