Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 237 Hüküm no: 173 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhzır Mehmed Çelebi’nin oğlu Mehmed Emin’e vasi tayin edildiği Mahmiye-i İstanbul’da Akseki mahâllesinde sâkin iken bundan akdem vefât eden Muhzır Mehmed Çelebi b. Mahmud’un sulbî sagīr oğlu Mehmed Emin’in tesviye-i umûruna cânib-i şer‘den bir vasî nasbı lâzım ve mühim olmağın emânet ve istikāmet ile ma‘rûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sagīr-i mezbûrun kız karındaşı bâ‘isetü’l-kitâb Emine Hatun hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûrun vakt-i rüşd-i sedâdına varınca tesviye-i umûruna vasî ve üzerine vâlidesi Hâce Fethi Hatun bt. Abdullah’ı hasbî nâzır nasb u ta‘yîn buyurduklarında onlardan dahi her biri vesâyet ve nezâret-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 20 min-Cumâdelâhire sene 1143. Şuhûdü’l-hâl: Hasan Efendi b. Mehmed, Mustafa Efendi b. Ali, Hüseyin Çelebi b. Hasan, İbrahim Efendi b. Ali, Ahmed Çelebi b. Hasan, Ahmed Çelebi b. Şa‘bân