Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 255 Hüküm no: 192 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdurrahman’ın oğlu Abdurrahman Çelebi ile vasisi İbrahim Ağa arasındaki para davasına sulh bedeli karşılığı son verildiği Mahmiye-i İstanbul’da Haydarhâne mahâllesi sūkkânından olup mahrûse-i Edirne’de Cingâne? cânibinde misâfiren sâkin iken bundan akdem vefât eden es-Seyyid Abdurrahman b. İsmail’in sulbî oğlu olup hâlâ bâ-hüccet-i şer‘iyye rüşdü sâbit olan es-Seyyid Abdurrahman Çelebi meclis-i şer‘-i şerîf-i enverde müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine bi’l-vesâye vâzı‘ü’l-yed olan işbu bâ‘isü’l-kitâb el-Hâc İbrahim Ağa b. Süleyman ikrâr ve takrîr-i kelâm edip babam müteveffâ-yı mezbûr es-Seyyid Abdurrahman Çelebi b. İsmail b. Mehmed’in terekesinden hâric ez-defter-i kassâm-ı askerî âhara bey‘ eylediği ma‘lûmü’l-vezn bakır semeni olup makbûz olan beş yüz elli guruş ile defter-i merkūmda Ali Ağa nâm kimesneye deyn-i müsbet tahrîr ettirip edâ eyledim dediği iki yüz guruşun aslı olmamağla meblağ-ı merkūm iki yüz guruş ki cem‘an yedi yüz elli guruşu dahi mezbûr el-Hâc İbrahim Ağa’dan taleb eylediğimde ol dahi bakır semeni olan meblağ-ı mezbûr beş yüz elli guruşu bi’l-külliye inkâr ve deyn-i merkūm iki yüz guruşun müsbet olduğunu beyan sadedinde olmağla beynimizde münâza‘ât-ı kesîre vâkı‘a olmuş idi. El-hâletü hâzihi muslihûn tavassut edip da‘vâ-i mezkûremden beni vasiyy-i merkūm ile iki yüz otuz guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh olan meblağ-ı mezbûr iki yüz otuz guruşu vasiyy-i mezbûr el-Hâc İbrahim Ağa yedinden tamâmen ahz u kabz eyledim fîmâ-ba‘d husûs-ı mezkûra ve babam müteveffâ-yı mezbûrun terekesinden zamân-ı vesâyetde bi’l-cümle makbûz ve masrûfuna müte‘allıka âmme-i de‘âvî ve mutâlebât ve kâffe-i eymân ve muhâsamâtdan mezbûr el-Hâc İbrahim Ağa’nın zimmetini ibrâ-i âmm-ı râfi‘ü’l-hısâm ile ibrâ ve ıskāt eyledim ol dahi bedel-i sulh olmak üzere bana medfû‘u olan meblağ-ı mezbûr iki yüz otuz guruşa müte‘allıka da‘vâdan zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 min-Cumâdelâhire sene 1143. Şuhûdü’l-hâl: Mehmed Efendi b. Ali, el-Hâc Ali Ağa b. Ömer, el-Hâc Mehmed b. Mustafa, Mehmed Çelebi b. Mustafa, Abdullah Çelebi b. Mehmed, Mustafa Efendi b. Mehmed, Mübâşir Ahmed Ağa b. Abdullah, Hasan Çelebi b. Hüseyin, Mehmed Odabaşı b. Mustafa, Abdullah Çelebi b. Mustafa