Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 254 Hüküm no: 191 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdadi Şemseddin Efendi’nin hayattayken yeniçeri nukud vakfından bazı eşyalarını rehin bırakarak borç almış olduğu Husûs-ı âti’l-beyanın mahâllinde istimâ‘ ve tahrîri iltimâs olunmağın savb-ı şer‘-i enverden mezûnen Mevlânâ es-Seyyid Mahmud Efendi irsâl olunup ol dahi mahmiye-i İstanbul’da Fenâî kurbünde Toptaşı mahâllesinde sâkin el-Hâc Mehmed b. İbrahim’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde Dergâh-ı âlî -dâme mahfûfen bi’l-meâlî- yeniçerilerinin yirmi dokuz bölüğe mahsûs oda mühimmâtına mevkūfe nukūdun bi’l-fi‘il mütevellîsi olan bâ‘isü’l-kitâb el-Hâc Abdüllatif meclis-i ma‘kūd-ı mezkûrda mahâlle-i mezbûrede sâkin iken bundan akdem katlen vefât eden Bağdâdî Şemseddin Efendi b. Abdullah’ın sulbî sagīr oğlu Ahmed’in tesviye-i umûruna kıbel-i şer‘den mansûb vasîsi olmağla terekesine bi’l-vesâye vâzı‘ü’l-yed olan mezbûr el-Hâc Mehmed mahzarında bi’t-tevliye üzerine da‘vâ ve takrîr-i kelâm edip müteveffâ-yı mezbûr Şemseddin Efendi b. Abdullah işbu yedimde olan mu‘anven ve mersûm ve bin yüz kırk iki senesi Zilka‘deti’ş-şerîfesinin on üçüncü günü târîhiyle müverrah temessük mûcebince mütevellîsi olduğum vakf-ı mezbûrdan asl-ı mâl üç yüz guruş ve üzerine devr-i şer‘î ile iltizâm-ı ribh olunan yirmi iki buçuk guruş ki cem‘an üç yüz yirmi iki buçuk guruş idâne ve teslîm ol dahi ber-vech-i muharrer istidâne ve kabz edip meblağ-ı mezbûr mukābelesinde eşyâ-i memlûkesinden işbu iki çift altın kuşak ve bir çift altın bilezik ve yedi aded altın yüzük ve altın paftalı incili bir çift gerdânlık ve inci ve zümrüd ile mahlût iki çift küpesini bana rehin vaz‘ ve teslîm ben dahi ber-vech-i muharrer yedinden irtihân ve kabz edip hattâ müteveffâ-yı mezbûr hâl-i kemâl-i sıhhatinde târîh-i mezkûrda meblağ-ı mezbûr cihet-i merkūmeden cânib-i vakfa-ı mezbûra zimmetinde vâcibü’l-edâ deyni olduğunu deyni ve eşyâ-i muharrere-i mezkûre mukābelesinde rehin olduğunu huzûr-ı Müslimînde ikrâr ve işhâd edip kable’l-edâ ve’l-fek fevt olmağla meblağ-ı mezbûru terekesinden edâ ve fekk-i rehne vasiyy-i mezbûra tenbîh olunmak bi’t-tevliye matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Mağnisalı Çelebi mahâllesinde sâkin <> Süleyman Çelebi b. Abdullah ve medîne-i hazret-i Eyyûb -humiyet ani’l-kürûb- mahâllâtından Kızıl Mescid mahâllesinde sâkin Osman Ağa b. Abdullah li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Şemseddin Efendi b. Abdullah b. Abdullah hâl-i kemâl-i sıhhatinde işbu müdde‘î-i mezbûr el-Hâc Abdurrahman’ın yedinde olan mu‘anven ve mersûm ve bin yüz kırk iki senesi Zilka‘deti’ş-şerîfesinin on üçüncü günü târîhiyle müverrah temessük mûcebince mütevellîsi olduğu vakf-ı mezbûrdan asl-ı mâl üç yüz guruş ve üzerine devr-i şer‘î ile iltizâm-ı ribh olunan yirmi iki buçuk guruş ki cem‘an üç yüz yirmi iki buçuk guruş istidâneye ve mukābelesinde eşyâ-i memlûkesinden işbu iki çift altın kuşak ve bir çift altın bilezik ve yedi aded altın yüzük ve bir altın paftalı incili bir çift gerdânlık ve inci zümrüd ile mahlût iki çift küpesini rehin vaz‘ ve teslîm eylediğini târîh mezkûrda huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan el-Hâc İbrahim b. Hasan ve Mehmed Çelebi b. Ahmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî ışrîn min-Cumâdelâhire sene 1143. Şuhûdü’l-hâl: Ahmed Efendi b. Mehmed, İbrahim Çelebi b. Abdullah, Mahmud Beşe b. Receb, Ali Beşe b. Osman, Ömer Ağa b. el-Hâc Osman