Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 259 Hüküm no: 194 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin hayattayken Mehmed ve İsmail’i azat ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Balizâde es-Seyyid Mustafa Efendi irsâl olunup ol dahi mahmiye-i İstanbul’da Dergâh-ı âlî -dâme mahfûfen bi’l-ma‘âlî- yeniçerilerinin Saksoncular Odası’na varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde oda-i mezbûre neferâtından olup bundan akdem vefât eden es-Seyyid Mustafa Beşe b. Abdullah’a rıkk-ı sâbıkını mu‘terif işbu açık kaşlı, elâ gözlü, Acemiyyü’l-asl, Müslimetü’l-millet Mehmed b. Abdullah nâm sagīre tashîhan li’d-da‘vâ vasî nasb olunan İsmail Beşe b. Musa meclis-i ma‘kūd-ı mezkûrda müteveffâ-yı mezbûrun zâhirde vâris-i ma‘rûfu olmayıp terekesi cânib-i beytülmala âid olmağın neferât-ı mezbûrenin bâ-hatt-ı hümâyûn-ı şevket-makrûn beytülmallarını kabza memûr olmağla rık olup terekesinden olmak üzere bi’l-emâne kendüye vaz‘-ı yed ve ber-vech-i âtî husûmet ve redd-i cevâba kıbel-i şer‘den mezûn olan oda-i mezbûre mütevellîsi el-Hâc Mehmed b. el-Hâc Hüseyin mahzarında bi’l-vesâye üzerine da‘vâ ve takrîr-i kelâm edip müteveffâ-yı mezbûr es-Seyyid Mustafa Beşe b. Abdullah b. Abdullah hâl-i marazında fevtinden on beş gün mukaddem işbu sagīr-i mezbûr Mehmed’i yedinde abd-i memlûkü olduğu hâlde mâlından tahrîr ve i‘tâk ve zümre-i ahrâr-ı asliyyîne idrâc ve ilhâk edip fevt oldukda terekesinin sülüsü sagīr-i mezbûrun fetâ kıymetinin sülüsânına müsâ‘id olmağla sagīr-i mezbûr sâir ahrâr-ı asliyyîn gibi hür olmuşken mütevellî-i mezbûr rık olup terekeden olmak zu‘muyla sagīr-i mezbûra bi-gayrı hakkın vaz‘-ı yed eder suâl olunup sebîlim tahliye olunmak bi’l-vesâye matlûbumdur dedikde gıbbe’s-suâl [44a] ve’l-inkâr müdde‘î-i mezbûrdan sıdk-ı makāline beyyine taleb olundukda udûl-i ahrâr-ı ricâl-i Müslimînden oda-i mezkûre yoldaşlarından Ömer Odabaşı b. İslâm ve Mehmed b. Ramazan ve İsmail Beşe b. Abdullah li-ecli’ş-şehâde meclis-i ma‘kūd-ı mezkûra hâzirûn olup isre’l-istişhâd fi’l-hakīka müteveffâ-yı mezbûr es-Seyyid Mustafa Beşe b. Abdullah b. Abdullah hâl-i marazında fevtinden on beş gün mukaddem işbu sagīr-i mezbûr Mehmed’i yedinde abd-i memlûkü olduğu hâlde huzûrumuzda mâlından tahrîr ve i‘tâk ve zümre-i ahrâr-ı asliyyîne idrâc ve ilhâk edip fevt oldukda terekesinin sülüsü sagīr-i mezbûrun fetâ kıymetinin sülüsânına müsâ‘id olmağla sagīr-i mezbûr sâir ahrâr-ı asliyyîn gibi hür olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed Çelebi b. Hasan ve el-Hâc Ahmed b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 22 min-Cumâdelâhire sene 1143. Şuhûdü’l-hâl: İbrahim Beşe b. Abdullah, Hüseyin Beşe b. Mustafa, Hasan Beşe b. Mahmud, Mustafa Beşe b. Ahmed, Osman Beşe b. Süleyman, Ali Beşe b. Hüseyin, Mustafa Beşe b. Hasan, İbrahim b. Mehmed, Mehmed Beşe b. Hasan, İbrahim Beşe b. İsmail Kezâlik orta boylu açık kaşlı, sarı elâ gözlü, Müslimetü’l-millet, bâ‘isü’l-kitâb İsmail b. Abdullah’ın şâhidân-ı mezbûrân şehâdetleriyle ıtkına ba‘de’l-hükm fi’t-târîhi’l-mezbûr li-seneti’l-merkūme. Şuhûdü’s-sâbıkūn