Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 270 Hüküm no: 204 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vefatıyla çocuklarına vasi tayin edildiği Mahmiye-i İstanbul’da Seydi Bey mahâllesinde sâkin iken bundan akdem vefât eden el-Hâc Mehmed Ağa b. Mahmud’un evlâd-ı sıgārı Sadık Mehmed ve Fâtıma ve Afife’nin tesviye-i emrlerine kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan sıgār-ı mezbûrûnun vâlideleri umdetü’l-muhadderât hâfızatü’l-kitâb Âişe Hanım bt. el-merhûm Çukadâr Mehmed Paşa’yı hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sıgār-ı mezbûrûnun vakt-i rüşd ü sedâdlarına değin tesviye-i emrlerine vasî nasb u ta‘yîn buyurduklarında ol dahi ber-vech-i muharrer vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Cumâdelâhire sene 1143. Şuhûdü’l-hâl: Fahrü’l-küttâb Hasan Efendi b. Abdullah, Ahmed Efendi b. Osman kâtib-i yeniçeriyân, Veliyüddin Ağa b. Ahmed, Ahmed Çelebi b. (°) dîdebân, Salih Beşe b. Halil, Ahmed Çelebi b. Hasan, Ahmed Çelebi b. İsmail