Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 270 Hüküm no: 205 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan’ın vasisi Emine Hatun’un vefatıyla yerine Hammami Yahya’nın tayini Mahmiye-i İstanbul’da Timurtaş mahâllesinde sâkin iken bundan akdem vefât eden Hüseyin Ağa b. el-Hâc Mehmed’in sulbiye sagīre kızı İsmihan’ın vâlidesi ve tesviye-i umûruna cânib-i şer‘-i enverden mansûbe vasîsi Emine Hatun bt. Yusuf Ağa hâlâ vefât edip umûr-ı vesâyet hâlî kalmağla yerine bir vasî nasbı lâzım olmağın emânet ve diyânet ile ma‘rûf ve istikāmet ile mevsûf ve her vechile vesâyet uhdesinden gelmeye kādir idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’ş-şerîf zâhir ve mukarrer olan işbu bâ‘isü’l-kitâb Hammâmî es-Seyyid el-Hâc Yahya b. el-Hâc Mehmed’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûrenin rüşd ü sedâdına varınca tesviye-i umûruna vasî nasb u ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cumâdelâhire sene 1143. Şuhûdü’l-hâl: el-Hâc Mustafa b. İsa, el-Hâc Mehmed b. el-Hâc Ahmed, el-Hâc İsmail b. el-Hâc Mehmed, Mehmed Çelebi b. Veli Efendi, Mustafa Çelebi b. Hasan, Hâfız Molla Mehmed b. Mustafa, Ahmed Bey b. Mehmed