Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 271 Hüküm no: 207 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin vefatıyla kızı Ümmü Gülsüm’e nafaka takdiri Rumeli kuzâtından sâbıkā Karlova kādısı olup mahmiye-i İstanbul’da Mimarsinan mahâllesinde sâkin iken bundan akdem vefât eden Hüseyin Efendi b. Mehmed Efendi’nin sulbiye sagīre kızı Ümmü Gülsüm’ün vâlidesi ve tesviye-i umûruna cânib-i şer‘den mansûbe vasîsi işbu bâ‘isetü’l-kitâb Rukıye Hatun bt. Halil Efendi talebiyle hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûreye mâl-ı müntakilinden yevmî yirmi akçe nafaka ve kisve-baha farz ve takdîr buyurup meblağ-ı mefrûz-ı mezkûr yevmî yirmi akçeyi sagīre-i mezbûrenin nafaka ve kisve ve sâir levâzım-ı zarûriyesine harc u sarfa ve vakt-i hâcetde istidâneye ve lede’z-zafer mâlına rücû‘a vasiyy-i mezbûre Rukıye Hatun’a izin vermeğin mâ-vaka‘a bi’t-taleb ketb olundu. Fî-gurreti Recebi’l-ferd sene 1143. Şuhûdü’l-hâl: Hatvanzâde Ahmed Efendi b. Mehmed Efendi, el-Hâc Feyzullah Efendi b. Mehmed Efendi, Mehmed Ağa b. el-Hâc Ömer, Ahmed Çelebi b. İsmail