Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 272 Hüküm no: 208 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Efendi’nin vefatıyla varislerinin üzerine Rukıye Hatun’un vasi tayin edildiği Rumeli kuzâtından sâbıkā Karlova kādısı olup mahmiye-i İstanbul’da Mimarsinan mahâllesinde sâkin iken bundan akdem vefât eden Hüseyin Efendi b. Mehmed Efendi’nin verâseti mahâlle-i mezbûrede sâkine zevce-i menkûha-i metrûkesi Rukıye Hatun bt. Halil Efendi ile sulbiye sagīre kızı Ümmü Gülsüm’e ve li-ebeveyn er karındaşları olup vilâyet-i Rumeli’nde hâlâ medîne-i Niğbolu kādısı olmağla medîne-i mezbûrede sâkin Abdullah Efendi ve vilâyet-i Anadolu’da medîne-i Üsküdar nevâhîsinden Kaymas nâhiyesinde Seyyid Aliler karyesinde sâkin Abdülfettah Efendi’ye ve Kandıra nâhiyesinde sâkine li-ebeveyn kız karındaşları Ümmühani Hatun ve Şeyhler nâhiyesinde sâkine Saliha Hatun’a münhasıra olduğu şer‘an zâhir ve mütehakkık oldukdan sonra sagīre-i mezbûrenin tesviye-i umûruna ve zikr olunan gāiblerin hisse-i mevkūfelerini ahz u kabz ve hıfza cânib-i şer‘den bir vasî nasbı lâzım olmağın emânet ve diyânet ile ma‘rûfe ve istikāmet ile mevsûfe ve her vechile vesâyet uhdesinden gelmeye kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘i’l-enver zâhir ve mukarrer olan bâ‘isetü’l-kitâb mezbûre Rukıye Hatun hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīre-i mezbûre Ümmü Gülsüm’ün vakt-i rüşd ü sedâdına varınca tesviye-i umûruna ve zikri mürûr eden gāiblerin hisse-i mevkūfelerini ahz u kabz ve hıfza vasî nasb u ta‘yîn buyurduklarında ol dahi vesâyet-i mezbûreyi kabûl ve merâsimini kemâ-yenbağī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-ışrîn min-Cumâdelâhir sene 1143. Şuhûdü’l-hâl: el-Hâc Feyzullah Efendi b. el-merhûm Mehmed Efendi, Muhzır el-Hâc Ali Ağa b. Abdullah, Mehmed Ağa b. el-Hâc Ömer, es-Seyyid Mustafa Çelebi b. Süleyman, Molla Mustafa b. Ahmed