Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 275 Hüküm no: 213 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ümmühani Hatun’un hayattayken mehrini kocası İbrahim Beşe’ye hibe ettiği <> Kezâlik akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûkü İbrahim Beşe b. Mustafa ile sadriye kızları Emine ve Havva’ya ve vâlidesi Azize Hatun bt. Abdülkadir’e münhasıra ve tashîh-i meselesi bi-hükmi’l-kavl on üç sehmden olmağla sihâm-ı mezbûreden üç sehmi zevci mezbûra dörder sehmi sagīretân-ı mezbûretândan her birine ve iki sehmi vâlidesi mezbûreye isâbeti tahakkukundan sonra zâtı ta‘rîf-i şer‘î ile mu‘arrefe olan mezbûr Azize Hatun meclis-i ma‘kūd-ı mezkûrda müteveffât-ı mezbûrenin zevci olmağla terekesine bi’l-verâse vaz‘-ı yed eden işbu râfi‘ü’l-kitâb mezbûr İbrahim Beşe mahzarında üzerine da‘vâ ve takrîr-i kelâm edip kızım müteveffât-ı mezbûrenin zevci mezbûr İbrahim Beşe zimmetinde mütekarrer ve ma‘kūdün-aleyh on iki bin akçe mehr-i müecceli olup meblağ-ı mezbûru kable’l-ahz ve’l-istîfâ fevt olmağla meblağ-ı mezbûrdan hisse-i ırsiye-i şer‘iyyemi taleb eylediğimde mezbûr İbrahim Beşe bana teslîmden imtinâ‘ eder suâl olunsun dedikde gıbbe’s-suâl mezbûr İbrahim Beşe cevâbında fi’l-hakīka zevcesi müteveffât-ı mezbûreye mukaddemâ on iki bin akçe mehr-i müeccel zimmetinde deyni olduğunu ikrâr lâkin zevcem müteveffât-ı mezbûre Ümmühani Hatun bt. el-Hâc Mustafa Efendi b. Ahmed Efendi hâl-i kemâl-i sıhhatinde fevtinden bir sene mukaddem zimmetimde mütekarrer ve ma‘kūdün-aleyh olan meblağ-ı mezbûr on iki bin akçeyi huzûr-ı Müslimînde bana hibe ve temlîk ben dahi meclis-i hibede ittihâb ve kabûl etmekle meblağ-ı mezbûrdan zimmetim berî olmuşdur deyü def‘le mukābele edicek gıbbe’l-istintâk ve’l-inkâr mezbûr İbrahim Beşe’den def‘-i meşrûhuna beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Keçeci Pîrî mahâllesinde sâkin Karabıçak Mehmed Beşe b. Ali ve nisâ-i sâlihâtdan Emetullah Hatun bt. Süleyman ve Saliha Hatun bt. Abdullah li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka şahsı rü’yetimiz ile ma‘lûmumuz olan müteveffât-ı mezbûre Ümmühani Hatun bt. el-Hâc Mustafa Efendi b. Ahmed Efendi hâl-i kemâl-i sıhhatinde fevtinden bir sene mukaddem zevci işbu İbrahim Beşe’ye zimmetinde mütekarrer ve ma‘kūdün-aleyh olan on iki bin akçe mehr-i müeccelini huzûrumuzda hibe ve temlîk ol dahi meclis-i hibede ittihâb ve kabûl etmekle meblağ-ı mezbûrdan zimmeti berî olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle müdde‘iye-i mezbûre Azize Hatun merkūm İbrahim Beşe ile bî-vech mu‘ârazadan men‘ eylediğini mevlânâ-yı mezbûr mahâllinde tahrîr ba‘dehû ma‘an mürsel Salih Çelebi b. Ahmed ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Cemâziyelâhire li-sene selâse ve erba‘în ve mi’e ve elf. Şuhûdü’l-hâl: Es-sâbıkūn