Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 274 Hüküm no: 212 Orijinal metin no: [47a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Azize Hatun’un vefat eden Ümmühani Hatun’un terekesinden hakkını aldığı Husûs-ı âti’l-beyanın mahâllinde ketb ü tahrîri için savb-ı şer‘-i enverden Mevlânâ Ahmed Efendi b. Osman irsâl olunup ol dahi mahmiye-i İstanbul’da el-Hâc Muhyiddin mahâllesinde sâkine iken bundan akdem vefât eden Ümmühani Hatun bt. el-Hâc Mustafa Efendi’nin verâseti zevc-i metrûkü İbrahim Beşe b. Mustafa ile sadriye sagīre kızları Emine ve Havva’ya ve vâlidesi Azize Hatun bt. Abdülbaki’ye münhasıra ve tashîh-i meselesi bi-hükmi’l-kavl on üç sehmden olmağla sihâm-ı mezbûreden üç sehmi zevci mezbûr İbrahim Beşe’ye ve dörder sehmi sagīretân-ı mezbûretândan her birine ve iki sehmi vâlidesi mezbûre Azize Hatun’a isâbeti tahakkukundan sonra zâtı ta‘rîf-i şer‘i ile mu‘arrefe olan mezbûre Azize Hatun meclis-i ma‘kūd-ı mezkûrda sagīretân-ı mezbûretânın babaları ve tesviye-i emrlerine kıbel-i şer‘den mansûb vasîleri olmağla tereke-i müteveffât-ı [47b] mezbûreye bi’l-verâse ve bi’l-vesâye vaz‘-ı yed eden bâ‘isü’l-kitâb mezbûr İbrahim Beşe mahzarında ikrâr ve takrîr-i kelâm edip kızım müteveffât-ı mezbûrenin terekesi tahrîr ve ba‘de-ihrâci’l-masârıf ber-mûceb-i defter-i kassâm-ı askerî tashîh-i mezbûr üzere südüs hisseme iseâbet eden iki bin yedi yüz seksen altı akçeyi vasiyy-i mezbûr İbrahim Beşe bana def‘ u teslîm ben dahi tereke-i müteveffât-ı mezbûreden olmak üzere yedinden bi’t-tamâm ve’l-kemâl alıp kabz eyledim ba‘de’l-yevm meblağ-ı mezbûr iki bin yedi yüz seksen altı akçeden mezbûr İbrahim Beşe yedinde ve zimmetinde bir akçe ve bir habbe bâkī kalmayıp tereke-i müteveffât-ı mezbûreye müte‘allık âmme-i de‘âvî ve mutâlebât ve eymân ve muhâsamâtdan mezbûr İbrahim Beşe’nin zimmetini ibrâ-i âmm-ı kātı‘ü’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Salih Çelebi b. Ahmed ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Cumâdelâhire li-sene selâse ve erba‘în ve mi’e ve elf. Şuhûdü’l-hâl: Es-sâbıkūn