Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 279 Hüküm no: 215 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın hayattayken Hasan b. Abdullah’ı azat ettiği Husûs-ı âti’l-beyanın mahâllinde istimâ‘ ve tahrîri için savb-ı şer‘-i enverden mezûnen Mevlânâ Mustafa Efendi b. el-merhûm Yahya Efendi irsâl olunup ol dahi mahmiye-i İstanbul’da Kâtib Şemseddin mahâllesi sükkânından olup bu sene-i mübârekede tarîk-i hacc-ı şerîfde bundan akdem vefât eden es-Seyyid Halil Ağa b. Hüseyin’in menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûra rıkk-ı sâbıkını mu‘terif işbu uzun boylu, açık kaşlı, elâ gözlü, Sırfiyyü?’l-asl, Müslimetü’l-millet hâfızü’l-kitâb Hasan b. Abdullah meclis-i ma‘kūd-ı mezkûrda müteveffâ-yı mezbûrun sulbiye sagīre kızları Âişe ve Rukıye’nin tesviye-i emrlerine bâ-hüccet-i şer‘iyye vasiyy-i muhtârları olmağla rık olup terekeden olmak üzere kendiye bi’l-vesâye vâzı‘ü’l-yed olan Numan Çelebi b. Mustafa mahzarında üzerine da‘vâ ve takrîr-i kelâm edip seyyidim müteveffâ-yı mezbûr es-Seyyid Halil Ağa b. Hüseyin b. Abdurrahman hâl-i kemâl-i sıhhatinde târîh-i kitâbdan on üç sene mukaddem abd-i memlûkü olduğum hâlde huzûr-ı Müslimînde hasbeten lillâhi te‘âlâ beni mâlından tahrîr ve i‘tâk ve silk-i ahrâr-ı asliyyîn zümresine idrâc ve ilhâk edip ben sâir ahrâr-ı asliyyîn gibi hür olmuş iken vasiyy-i mezbûr rık olup terekeden olmak üzere bana bi-gayrı hakkın vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl vasiyy-i mezbûr cevâbında mevsûf-ı mezbûr rık olup terekeden olmak üzere bi’l-vesâye vaz‘-ı yedini ikrâr lâkin müdde‘î-i mezbûrun ber-vech-i muharrer müdde‘âsını inkâr edicek müdde‘î-i mezbûrdan müdde‘âsına beyyine taleb olundukda udûl-i ahrâr-ı ricâl-i Müslimînden mahâlle-i mezbûre sükkânından Halil Ağa b. Murtaza ve Hasan Çelebi b. Süleyman li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr es-Seyyid Halil Ağa b. Hüseyin b. Abdurrahman hâl-i kemâl-i sıhhatinde târîh-i kitâbdan on üç sene mukaddem işbu müdde‘î-i mezbûr Hasan abd-i memlûkü olduğu hâlde huzûrumuzda mâlından hasbeten lillâhi te‘âlâ tahrîr ve i‘tâk ve silk-i ahrâr-ı asliyyîne idrâc ve ilhâk edip mevsûf-ı mezbûr sâir ahrâr-ı asliyyîn gibi hür olmuşdur, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Ahmed Çelebi b. Ali ve Halil b. Mehmed ile meclis-i şer‘a gelip alâ-vuku‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 min-Cumâdelâhire sene 1143. Şuhûdü’l-hâl: Hüseyin Ağa b. İsmail, Osman Çavuş b. (°), Mehmed Ali b. Muslı, Mumcu Mehmed Çelebi b. (°), Mustafa Çelebi b. el-Hâc (°)