Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 298 Hüküm no: 229 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin vasiyetini yerine getirmek üzere Ahmed Ağa’yı vasi tayin ettiği Kezâlik akd-i meclis-i şer‘-i şerîf ettikde fi’l-asl vilâyet-i Rumeli’nde Varna kasabası ahâlîsinden ve Dergâh-ı âlî -dâme mahfûfem bi’l-meâlî- yeniçerilerinden on yedi bölük neferâtı yoldaşlarından olup mahmiye-i mezbûrda Çıkrıkçı Kemâl mahâllesinde sâkin sâbıkā yeniçeriler ağası olan Hasan Ağa menzilinde misâfiren sâkin iken bundan akdem vefât eden Ali Beşe b. Abdullah’ın ber-vech-i âtî vasiyy-i muhtârlığını iddi‘â eden işbu bâ‘isü’l-kitâb Ahmed Ağa b. Abdurrahman meclis-i ma‘kūd-ı mezbûrda tâife-i mezbûrenin beytülmalı emîni olmağla müteveffâ-yı mezbûrun zâhirde vâris-i ma‘rûfu olmamağla terekesi cânib-i beytülmala âid olmağın bi’l-emâne vâzı‘ü’l-yed olup husûmet ve redd-i cevâba kıbel-i şer‘den mezûn olan Ahmed Ağa b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Ali Beşe b. Abdullah b. Abdülmennan hâl-i marazında fevtinden üç gün mukaddem bi-emrillâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup elli guruş ile levâzım-ı techîz ve tekfînim görüldükden sonra bâkī kalan terekemden on bin akçe ile ıskāt-ı salâtım oluna ve beş bin akçe ile on hatm-i şerîf ettirile ve elli bin akçe ile on aded mushaf-ı şerîf iştirâ olunup müstahıkkīnden birer kimesneye verile ve on iki bin akçe dahi vakf olunup onu on bir buçuk hesâbı üzere istirbâh ve hâsıl olan nemâsı kasaba-i mezbûrda binâ eylediğim çeşmenin ve su yollarının ta‘mîr ve termîmine sarf oluna deyü huzûr-ı Müslimînde vasiyet edip tenfîzine beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran-aleyhâ vefât ettikde vârisi olmayıp ve terekesi meblağ-ı mûsâ-bih-i mezkûra vefâ etmekle tenfîz-i vesâyâ murâd ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden olup mahâlle-i mezbûrda sâkin Hasan Ağa b. Abdullah ve Halil Beşe b. Şaban li-ecli’ş-şehâde meclis-i ma‘kūd-ı mezbûra hâzırân olup isre’l-istişhâd fi’l-hakīka müteveffâ-yı mezbûr Ali Beşe b. Abdullah b. Abdülmennan hâl-i marazında fevtinden üç ay mukaddem bi-emrillâhi te‘âlâ vefât eylediğimde mecmû‘-ı terekem ve zimem-i nâsda olan hukūkum ahz u kabz olunup elli guruş ile levâzım-ı techîz ve tekfînim görüldükden sonra bâkī kalan terekemden üç bin akçe ile ıskāt-ı salâtım oluna ve beş bin akçe ile on hatm-i şerîf ettirile ve altı bin akçe ile on aded mushaf-ı şerîf iştirâ olunup müstahıkkīnden birer kimesneye verile ve on iki bin akçe dahi vakf olunup onu on bir buçuk hesâbı üzere istirbâh ve hâsıl olan nemâsı kasaba-i mezbûrda binâ eylediğim çeşmenin ve su yollarının ta‘mîr ve termîmine sarf oluna deyü huzûrumuzda vasiyet edip tenfîzine işbu müdde‘î-i mezbûr Ahmed Ağa b. Abdurrahman’ı vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran-aleyhâ vefât ettikde vârisi olmayıp ve terekesi meblağ-ı mûsâ-bih-i mezkûra vâfîdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr ilâ-âhırihî. Fi’t-târîhi’l-mezbûr li-seneti’l-merkūme. Şuhûdü’l-hâl: Mustafa Efendi b. Mehmed, el-Hâc Abdurrahman b. Ali, Ahmed Çelebi b. Hasan, İsmail Efendi b. ( ), Osman Odabaşı b. Abdullah, el-Hâc İbrahim b. Mehmed