Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 297 Hüküm no: 228 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı İbrahim Beşe’nin vasiyetini yerine getirmek üzere Eyüb Beşe’yi vasi tayin ettiği Husûs-ı âti’l-beyanın mahâllinde ketb ü tahrîri için bi’l-iltimâs savb-ı şer‘-i şerîfden mezûnen irsâl olunan Mevlânâ Mehmed Efendi mahmiye-i İstanbul’da Ağakapısı’nda beytülmal emîni olanlara mahsûs odaya varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde fi’l-asl vilâyet-i Rumeli’nde Halkalı karyesi ahâlîsinden olup mahmiye-i mezbûrda Dergâh-ı âlî -dâme mahfûfen bi’l-meâlî- yeniçerilerinden cemâ‘at yoldaşlarından olmağla oda-i mezbûrda sâkin iken bundan akdem vefât eden Aşçı İbrahim Beşe b. Ali’nin ber-vech-i âtî vasiyy-i muhtârlığını iddi‘â eden işbu bâ‘isü’l-kitâb Eyüb Beşe b. Ahmed meclis-i ma‘kūd-ı mezbûrda tâife-i mezbûrenin beytülmalı emîni olmağla müteveffâ-yı mezbûrun zâhirde vâris-i ma‘rûfu olmamak üzere <> terekesine bi’l-emâne vâzı‘ü’l-yed ve husûmet ve redd-i cevâba kıbel-i şer‘den mezûn olan Ahmed Ağa b. Mustafa mahzarında üzerine da‘vâ ve takrîr-i kelâm edip müteveffâ-yı mezbûr Aşçı İbrahim Beşe b. Ali b. Abdullah hâl-i kemâl-i sıhhatinde fevtinden üç ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüldükden sonra mecmû‘-ı terekemin sülüsünden ancak yüz elli guruşu ifrâz olunup meblağ-ı mezbûr ile yeniçeri aşçılarına mahsûs bir sîm kebîr aynalı bıçak iştirâ ve oda-i mezbûreye vakf oluna ve bâkī kalan terekem karye-i mezbûrede sâkin olup hasran vârisim olan li-ebeveyn kız karındaşım oğlu Hasan’a îsâl oluna deyü huzûr-ı Müslimînde vasiyet ve tenfîzine beni vasiyy-i muhtâr nasb u ta‘yîn eyledikde ben dahi muvâcehesinde ba‘de’l-kabûl musırran-aleyhâ vefât ettikde terekesinin sülüsü meblağ-ı mûsâ-bih-i mezkûra vefâ etmekle tenfîz murâd ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrda Hoca Hayreddin mahâllesinde sâkin Hâfız Mustafa Efendi b. Mehmed ve Molla Aşkī mahâllesinde el-Hâc Abdurrahman b. Ali li-ecli’ş-şehâde meclis-i ma‘kūd-ı mezbûra [53a] hâzırân olup isre’l-istişhâd fi’l-hakīka müteveffâ-yı mezbûr Aşçı İbrahim Beşe b. Ali b. Abdullah hâl-i kemâl-i sıhhatinde fevtinden üç ay mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görüldükden sonra mecmû‘-ı terekemin sülüsünden ancak yüz elli guruş ifrâz olunup meblağ-ı mezbûr ile yeniçeri aşçılarına mahsûs bir sîm kebîr aynalı bıçak iştirâ ve oda-i mezbûra vakf oluna ve bâkī kalan terekem karye-i mezbûrda sâkin olup hasran vârisim olan li-ebeveyn kız karındaşım oğlu Hasan’a îsâl oluna deyü huzûrumuzda vasiyet ve tenfîzine işbu müdde‘î-i mezbûr Eyüb Beşe b. Ahmed’i vasiyy-i muhtâr nasb u ta‘yîn edip ol dahi muvâcehesinde ba‘de’l-kabûl musırran-aleyhâ vefât ettikde terekesinin sülüsü meblağ-ı mûsâ-bih-i mezkûra vâfîdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde ketb ü tahrîr, ba‘dehû ma‘an irsâl olunan Ahmed b. Hüseyin ve Salih b. Halil ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cemâziyelâhire sene 1143. Şuhûdü’l-hâl: Halil Beşe b. Şaban, Hasan Ağa b. Abdullah, İsmail Efendi, Osman Odabaşı b. Abdullah, el-Hâc İbrahim b. Mehmed, Ali Beşe b. Mustafa, Ahmed Beşe b. Mustafa korucubaşı