Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 302 Hüküm no: 233 Orijinal metin no: [53b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin küçük oğlu Mehmed’e Fatıma Hatun’un vasi tayin edildiği Mahmiye-i İstanbul’da Derviş Ali mahâllesinde sâkin iken bundan akdem vefât eden Abdi Çelebi b. Yusuf Çavuş Ağa’nın sulbî sagīr oğlu Mehmed’in min-kıbeli’l-üm ceddesi ve tesviye-i umûruna kıbel-i şer‘den mansûbe vasiyyesi Saliha Hatun bt. Himmet fevt oldukda sagīr-i mezbûrun tesviye-i umûruna kıbel-i şer‘den bir vasî nasbı lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmi Müslimîn haberleriyle lede’ş-şer‘ zâhir ve mukarrer olan sagīr-i mezbûrun ammetesi bâ‘isetü’l-kitâb Fâtıma Hatun bt. el-mezbûr Ali Çavuş Ağa’yı hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb tûbâ-lehû ve hüsnü-meâb efendi hazretleri sagīr-i mezbûr Mehmed’in vakt-i rüşd ü sedâdına değin tesviye-i umûruna vasî nasb u ta‘yîn buyurduklarında ol dahi vesâyet-i mezbûreyi kabûl ve hizmet-i lâzımesin kemâ-yenbağī edâya ta‘ahhüd ve iltizâm etmeğin mâ vaka‘a bi’t-taleb ketb olundu. Fî 5 min-Cemâziyelâhire sene 1143. Şuhûdü’l-hâl: Mehmed Bey b. Ali, Ahmed Beşe b. Mustafa, [54a] Mustafa Çelebi b. Ali, Mehmed Ağa b. Abdurrahman, Ali Ağa b. Mahmud, Ahmed Çelebi b. İsmail, Hasan Çelebi b. Ömer ve gayruhum