Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 303 Hüküm no: 234 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa’nın çocuklarına nafaka takdiri ve annelerinin vasi tayin edildiği Mahmiye-i İstanbul’da Şeyh Ferhad mahâllesinde Hadımodaları demekle ma‘rûf odalarının birinde sâkin iken bundan akdem vefât eden el-Hâc Mustafa b. Mehmed’in evlâd-ı sıgārı Süleyman ve Mehmed ve Âişe’nin tesviye-i emrlerine cânib-i şer‘den bir vasî nasb olunmak lâzım ve mühim olmağın emânet ile ma‘rûfe ve istikāmet ile mevsûfe ve her vechile vesâyet-i mezbûre uhdesinden gelmeğe kādire idiği zeyl-i vesîkada muharrerü’l-esâmi Müslimîn haberleriyle lede’ş-şer‘i’ş-şerîfi’l-enver zâhir ve nümâyân olan sıgār-ı mezbûrûnun vâlideleri bâ‘isetü’l-kitâb Saliha Hatun bt. Abdullah’ı hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sıgār-ı mezbûrûnun vakt-i rüşd ü sedâdlarına varınca tesviye-i emrlerine vasî nasb u ta‘yîn buyurduklarında ol dahi vesâyet-i mezbûreyi kabûl ve merâsimini edâya ta‘ahhüd ve iltizâm eyledikden sonra vasiyye-i mezbûre Saliha Hatun talebiyle hâkim-i mûmâ-ileyh efendi hazretleri sıgār-ı mezbûrûnun babaları müteveffâ-yı mezbûrdan müntakil mâllarından her birine yevmî üçer akçe nafaka ve kisve-baha farz ve takdîr buyurup meblağ-ı mefrûz-ı mezbûr yevmî üçer akçeyi sıgār-ı mezbûrûnun nafaka ve kisve ve sâir levâzım-ı zarûriyelerine harc u sarfa ve vakt-i hâcetde istidâneye ve inde’z-zafer mâllarına rücû‘a vasiyye-i mezbûre Saliha Hatun’a izin birle mâ vaka‘a bi’t-taleb ketb olundu. Fî 5 Receb sene 1143. Şuhûdü’l-hâl: el-Hâc Süleyman Ağa b. Mehmed, Derviş Mehmed Efendi b. Mehmed Emin, İbrahim Ağa b. Mehmed, Arabacı Hüseyin Beşe b. Abdullah, Ahmed Çelebi b. Hasan, Salih Çelebi b. Halil