Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 303 Hüküm no: 235 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa’nın çocuklarına kalan evin yarı hissesinin satılmasına izin verildiği Kezâlik fevt olan el-Hâc Mustafa b. Mehmed’in evlâd-ı sıgārı Süleyman [ve] Mehmed ve Âişe’nin vâlideleri ve tesviye-i emrlerine cânib-i şer‘den mansûbe vasiyyeleri olup zâtı ta‘rîf-i şer‘î ile mu‘arrefe olan bâ‘isetü’l-kitâb Saliha Hatun bt. Abdullah meclis-i şer‘-i şerîf-i lâzimü’t-tevkīrde bi’l-vesâye ikrâr ve takrîr-i kelâm edip mahâlle-i mezbûrede ashâb-ı hayrâtdan Hâsodabaşı Hasan Ağa Evkāfı’ndan icâreteyn-i ma‘lûmeteyn ile müteveffâ-yı mezbûrun ile’l-vefât taht-ı tasarrufunda olup ba‘de-vefâtihî evlâd-ı sıgār-ı mezbûrûna intikāl-i âdî ile intikāl edip mahâlle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzilin nısf hissesi sıgār-ı mezbûrûnun olup lâkin sıgār-ı mezbûrûnun nafaka ve kisve-bahaya eşedd-i ihtiyâçları olmağla menzil-i mezbûrdan sıgār-ı mezbûrûnun nısf hisselerini ba‘de’l-müzâyede ve inkıtâ‘i’r-rağbe bedel-i misli ve ma‘rifet-i mütevellî ile âhara ferâğ ve bedel-i ferâğ istirbâh olunup hâsıl olan ribhi sıgār-ı mezbûrûnun nafaka ve kisvelerine sarf olunmak haklarında enfa‘ ve evlâ olmağla menzil-i mezbûrda olan nısf hisse-i mezkûrelerin âhara ferâğa kıbel-i şer‘den mezûn olmak bi’l-vesâye matlûbumdur dedikde vasiyye-i mezbûrenin kelimât-ı meşrûhası vâkı‘a mutâbık idiği zeyl-i vesîkada muharrerü’l-esâmi Müslimîn haberleriyle lede’ş-şer‘i’ş-şerîfi’l-enver zâhir ve nümâyân olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri sıgār-ı mezbûrûnun menzil-i mezbûrda olan nısf hisselerini ber-vech-i muharrer bedel-i misli ve ma‘rifet-i mütevellî ile âhara ferâğa vasiyye-i mezbûre Saliha Hatun’a izin birle mâ vaka‘a bi’t-taleb ketb olundu. Fî 5 Receb sene 1143. Şuhûdü’s-sâbıkūn