Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 306 Hüküm no: 237 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Ali’nin vasiyetini yerine getirmek üzere vasi tayini Husûs-ı âti’l-beyanın mahâllinde istimâ‘ ve tahrîri için savb-ı şer‘-i şerîf-i enverden mezûnen irsâl olunan Mevlânâ Mehmed Efendi b. İbrahim mahmiye-i İstanbul’da Hoca Hayreddin mahâllesinde sâkin iken bundan akdem vefât eden Attâr el-Hâc Ali b. Ali’nin menziline varıp zeyl-i kitâbda muharrerü’l-esâmi Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun ber-vech-i âtî vasiyy-i muhtârı olduğunu iddi‘â eden bâ‘isü’l-kitâb Berber Mehmed Çelebi b. Ali meclis-i ma‘kūd-ı mezkûrda müteveffâ-yı mezbûrun zâhir[de] zevce-i menkûha-i metrûkesi Hadîce Hatun bt. Abdullah’dan gayrı vâris-i ma‘rûfu olmayıp terekesinin rub‘u zevcesi mezbûre Hadîce Hatun’a ve selâse-i erbâ‘ı cânib-i beytülmala âid olmağın mahmiye-i mezbûrede bi’l-fi‘il beytülmal-ı hâssa emîni olmağla tereke-i müteveffâ-yı mezbûrun selâse-i erbâ‘ına bi’l-emâne vaz‘-ı yed ve husûmet ve redd-i cevâba kıbel-i şer‘den mezûn olan fahrü’l-akrân es-Seyyid Mustafa Ağa b. Ahmed mahzarında üzerine da‘vâ ve takrîr-i kelâm edip müteveffâ-yı mezbûr Attâr el-Hâc Ali b. Ali b. Abdullah hâl-i marazında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekemi vilâyet-i Rumeli’nde Plevne kazâsında sâkin li-ebeveyn er karındaşım oğlu Hüseyin b. Abdullah nâm gāibe îsâl oluna deyü vasiyet edip tenfîzine huzûr-ı Müslimînde beni vasiyy-i muhtâr nasb u ta‘yîn ettikde ben dahi muvâcehesinde ba‘de’l-kabûl musırran alâ-îsâihî mezbûr el-Hâc Ali vefât etmekle tenfîz-i vesâyâ murâd eylediğimde emîn-i mûmâ-ileyh mâni‘ olur, suâl olunup kasr-ı yedine ve müteveffâ-yı mezbûrun terekesinin selâse-i erbâ‘ını bana teslîmine emîn-i mezbûra tenbîh olunmak bi’l-vesâye matlûbumdur dedikde gıbbe’s-suâl emîn-i mûmâ-ileyh cevâbında terekeye vaz‘-ı yedini ikrâr lâkin müdde‘î-i mezbûrun ber-vech-i ...? müdde‘âsını inkâr edicek, müdde‘î-i mezbûr[dan] müdde‘âsına beyyine taleb olundukda udûl-i ahrâr-ı ricâl-i Müslimînden mahmiye-i mezbûre[de] Hoca Hayreddin mahâllesinde sâkin es-Seyyid Ahmed Efendi b. es-Seyyid Ali ve Ali Ağa b. İbrahim li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka müteveffâ-yı mezbûr Attâr el-Hâc Ali b. Ali b. Abdullah hâl-i marazında fevtinden üç gün mukaddem bi-emrillâhi te‘âlâ vefât eylediğimde cemî‘ terekem ve zimem-i nâsda olan hukūkum ahz u kabz olunup vech-i mesnûn üzere levâzım-ı techîz ve tekfînim görülüp düyûn-ı müsbetem kazâ olundukdan sonra bâkī kalan terekem vilâyet-i Rumeli’nde Plevne kazâsında sâkin li-ebeveyn karındaşım Hüseyin b. Abdullah nâm gāibe îsâl oluna deyü vasiyet edip tenfîzine işbu müdde‘î-i mezbûr Berber Mehmed Çelebi’yi huzûrumuzda vasiyy-i muhtâr nasb u ta‘yîn ettikde ol dahi muvâcehesinde ba‘de’l-kabûl musırran alâ-îsâihî mezbûr el-Hâc Ali vefât eyledi, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahâllinde tahrîr ba‘dehû ma‘an mürsel Salih Çelebi b. Ali ve Ahmed Çelebi b. Hasan ile meclis-i şer‘a gelip alâ-vuku‘ihî inhâ ve takrîr etmeğin mâ vaka‘a bi’t-taleb ketb olundu. Fî 3 min-Recebi’l-ferd sene 1143. Şuhûdü’l-hâl: el-Hâc Ali b. Mustafa, es-Seyyid İbrahim Çelebi b. es-Seyyid Hasan, Mehmed Çavuş b. Abdullah, el-Hâc Ali b. Hüseyin, es-Seyyid Ahmed Efendi b. es-Seyyid Ali, Mehmed Çelebi b. İsmail