Kısmet-i Askeriye Mahkemesi 59 Numaralı Sicil (H. 1143 / M. 1730-1731) cilt: 64, sayfa: 307 Hüküm no: 238 Orijinal metin no: [55a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Mehmed Çelebi’nin vefatıyla dükkândaki aletler ve tütünün satılarak alacaklılarına verilmesi Kezâlik akd-i meclis-i şer‘-i şerîf ettikde müteveffâ-yı mezbûrun terekesini kabz ve düyûn-ı müsbetesini edâya bâ-hüccet-i şer‘iyye vasiyy-i muhtârı olan Berber Mehmed Çelebi b. Ali meclis-i ma‘kūd-ı mezkûrda mahmiye-i mezbûrede Unkapanı sûkunda mütemekkin bâ‘isü’l-kitâb Duhânî el-Hâc Ali b. Mustafa mahzarında bi’l-vesâye ikrâr ve takrîr-i kelâm edip müteveffâ-yı mezbûrun ile’l-vefât yedinde mülk ve hakkı idiği müsbet olup mahâlle-i mezbûrede vâki‘ attâr dükkânında mevcûde yüz on kıyye ucu kuru ve Vardar ta‘bîr olunur Yenice duhânı ile dükkân-ı merkūm içinde bi’l-cümle âlât ve besâtı ba‘de’l-müzâyede ve ınkıtâ‘i’r-rağbe semen-i misli ile tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mezbûr Duhânî el-Hâc Ali’ye on bir bin akçeye bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı merkūm on bir bin akçeyi müteveffâ-yı mezbûrun dâyinlerine red için mezbûr el-Hâc Ali yedinden vesâyetim hasebiyle tamâmen alıp kabz eyledim, min-ba‘d meblağ-ı mezbûrdan mezbûr el-Hâc Ali yedinde ve zimmetinde bir akçe ve bir habbe bâkī kalmayıp ba‘de’l-yevm duhân-ı mezkûr ile attâr dükkânında mevcûde âlât ve besâtı mezbûr el-Hâc Ali’nin mülk-i müşterâsı ve hakk-ı sırfı olmuşdur, keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mürsel mezbûrân. Fi’t-târîhi’l-mezbûr li-seneti’l-merkūme. Eş-Şuhûdü’s-sâbıkūn